पुणे : जुन्नर तालुक्यातील वडगाव आनंद येथील गोमाता सहकारी दूध उत्पादक संस्थेच्या वतीने गवळी व सभासदांच्या पशुधनांचे मोफत ‘लम्पी स्कीन’ (Free Lumpy Skin Vaccination) या आजारांवरील लसीकरण (Animal Vaccination) करण्यात आले, अशी माहिती संस्थेचे अध्यक्ष अशोक गडगे यांनी दिली.

याप्रसंगी सुरेश गडगे, राहुल खोकले, गणेश देवकर, विलास गाडगे, राजाराम भुजबळ, गोपाळ फुलसुंदर, रेश्मा चौगुले, सविता शिंदे, रामदास वाळंज, सचिव अभिषेक कोकाटे आदी मान्यवर ग्रामस्थ उपस्थित होते.

या प्रसंगी डॉ. विजय देवकर यांच्या गोठ्यातील पशुधनास डॉ. सिद्धार्थ गाडगे, डॉ. हर्षल हाडवळे, डॉ. संजय घंगाळे यांनी लसीकरण केले. डॉ. महेश शेजाळ म्हणाले, की ‘लम्पी स्कीन’चा प्रादुर्भाव म्हैस, गाय तसेच बैल या सर्व जनावरांना होते. विशेष करून याचा प्रादुर्भाव लहान वासरांना मोठ्या प्रमाणावर होत आहे. तसेच, देशी जनावरांपेक्षा संकरित जनावरे या विषाणू आजाराला अधिक बळी पडत आहेत.

पशुपालकांनी घाबरून न जाता लम्पी स्कीनसदृश लक्षणे आढळल्यास आपल्या गावात असलेल्या पशुवैद्यकीय दवाखान्यात संपर्क साधावा, असे आवाहन पशुसंवर्धन विभागाकडून करण्यात आले आहे.