पारगाव, ता. आंबेगाव ः लम्पी स्कीन आजाराच्या (Lumpy Skin Disease) वाढत्या प्रादुर्भावामुळे प्रशासनाने बैलपोळ्याला (Bail Pola) बैलांना एकत्र आणण्यास, तसेच मिरवणूक काढण्यास बंदी (Ban On Bail Pola Celebration) आणली आहे. त्या पार्श्‍वभूमीवर तालुक्यातील खडकवाडी येथे भैरवनाथ बैलगाडा संघटनेच्या वतीने रक्तदान शिबिराचे आयोजन करण्यात आले होते. या शिबिरात एकूण १२५ बाटल्या रक्त संकलित झाले.

स्कीन आजाराचे सावट बैलपोळा सणावर पसरले असून, जनावरांमध्ये त्याचा प्रसार होऊ नये म्हणून प्रशासनातर्फे काळजी घेतली जात आहे. भैरवनाथ बैलगाडा संघटना व पुणे ब्लड बँक यांच्यामार्फत रक्तदान शिबिराचे आयोजन करून अनोख्या पद्धतीने बैलपोळा साजरा केला.

शनिवारी (ता. २४) दिवसभरात १२५ तरुणांनी रक्तदान केले. प्रत्येक रक्तदात्यास एक आकर्षक ब्लूटूथ हेडफोन, एक आवळ्याचे झाड व प्रमाणपत्र संघटनेतर्फे देण्यात आले. या वेळी प्रकाश कबाडी, माजी सरपंच अनिल डोके, उद्योजक गुलाब वाळुंज, वाळुंजनगरचे माजी सरपंच महेंद्र वाळुंज, संतोष रामभाऊ सुक्रे, उपसरपंच एकनाथ सुक्रे, गोरक्ष पोखरकर, दिलीप डोके, दादाभाऊ वाळुंज उपस्थित होते.