Nashik News : जिल्ह्यात गेल्या दोन महिन्यांत ४० जनावरांमध्ये लम्पी स्कीनसदृश लक्षणे आढळून आली होती. ही बाब गांभीर्याने घेत पशुसंवर्धन विभागाने उपाययोजना हाती घेतल्या. बाधित जनावरांवर उपचार केल्याने ३२ जनावरे बरी झाली. मात्र मालेगाव व सिन्नर तालुक्यात २ जनावरे दगावली. तर आणखी इतर ६ जनावरांवर उपचार सुरू आहेत.

अजूनही लम्पी स्कीन बाधित जनावरे आढळून येत असल्याने लसीकरणाचा वेग वाढविण्यावर पशुसंवर्धन विभागाचा भर आहे. मागील वर्षी पशुपालकांमध्ये भीती निर्माण झाली होती. त्यामुळे पशुसंवर्धन विभाग यंदाही पुन्हा ‘अलर्ट’ मोडवर आहे.

जिल्ह्यात निफाड, दिंडोरी, चांदवड, सटाणा, सिन्नर व नांदगाव तालुक्यांत जनावरे बाधित झाली आहेत. तर आदिवासी पट्ट्यात इगतपुरी, पेठ, सुरगाणा व त्र्यंबकेश्वर तालुक्यांत अद्याप आजाराचा शिरकाव नाही.

मागील वर्षीच्या तुलनेत परिस्थिती काहीशी बरी आहे. मात्र धोका अजूनही पूर्णपणे टाळलेला नाही. लम्पी स्कीनसदृश लक्षणे दिसून येत असल्याने पुन्हा परिस्थितीवर नियंत्रण ठेवण्यासाठी प्रयत्न केले जात आहेत. मागील वर्षी गायी व दुभत्या जनावरांमध्ये प्रादुर्भाव मोठ्या प्रमाणावर आढळून आला होता.

त्यानुसार गोवर्गीय जनावरांमध्ये बैलांनाही वेळेत लसीकरण करण्यात आलेले होते. त्यानुसार बाधित जनावर आढळून आल्यास परिसर बाधित क्षेत्र म्हणून जाहीर करण्यात आला. त्यानुसार लसीकरणाचा वेग वाढविण्यात आला. मात्र गायींना लसीकरण झाले, परंतु तेथे जन्माला आलेल्या वासरांना लसीकरण करण्यात आले नव्हते.

जिल्ह्यात पावणेनऊ लाख जनावरांना लस उपलब्ध

जिल्ह्यात ८ लाख ९५ लाख ५० इतके गोवर्गीय पशुधन आहे. त्यानुसार संपूर्ण पशुधनासाठी आता लसीकरण उपलब्ध झालेले आहे. जुलै महिन्यात ४ लाख ४७ हजार ३६८ हे पहिल्या टप्प्यात लसीकरण पूर्ण झाले आहे. आता दुसऱ्या टप्प्यात ४ लाख ४७ हजार ५०० लसमत्रा उपलब्ध असून, लसीकरण केले जात आहे.