Nagpur News : राज्यातील पोल्ट्री व्यावसायिक व त्यांच्याकडील पक्षी याविषयी एका क्‍लिकवर माहिती मिळावी, याकरिता जिल्हा पशुसंवर्धन आयुक्‍तांना आकडेवारी संकलनाचे निर्देश पशुसंवर्धन आयुक्‍तस्तरावरून देण्यात आले होते. मार्च २०२४ पर्यंतची मुदत त्याकरिता निश्‍चित केली होती. परंतु ही मुदत पाळण्यात न आल्याने आता या कामाला आता गती देण्याचे निर्देश देण्यात आले आहेत.

पशुसंवर्धन विभागाकडे राज्यातील पोल्ट्री व्यवसायिकांची अधिकृत आकडेवारीच नाही. त्यामुळे कोंबड्यांवर रोगाचा प्रादुर्भाव झाल्यास उपाययोजनांबाबत सर्वंकष निर्णय घेता येत नाही. त्यामुळेच राज्यातील पोल्ट्री शेड तसेच त्यामधील पक्ष्यांची नोंद घ्यावी, असे निर्देश ८ जानेवारी २०२४ रोजी आयुक्‍तालयस्तरावरून देण्यात आले होते.

राज्यातील जिल्हा पशुसंवर्धन उपायुक्‍तांमार्फत ही माहिती संकलित करण्याचे नियोजन होते. या मध्ये मांसल तसेच अंड्यावरील पक्षी अशा दोन्ही श्रेणींतील पक्ष्यांची नोंदणी होणार होती. परंतु अपेक्षित गतीने हे काम झाले नाही.

परिणामी राज्य शासनाकडे अद्यापही पोल्ट्री शेड व पक्ष्यांची नोंदणी होऊ शकलेली नाही. त्यामुळेच निश्‍चित आकडाही कळणे अवघड आहे. परिणामी, आता पुन्हा स्मरणपत्र पाठवीत या कामाला गती देण्याची सूचना आयुक्‍त कौस्तुभ दिवेगावकर यांनी केली आहे.

‘प्रदूषण नियंत्रण’च्या नोंदणीला स्थगिती

पोल्ट्री शेडधारकांना महाराष्ट्र प्रदूषण नियंत्रण मंडळाचे प्रमाणपत्र आवश्‍यक आहे. असे प्रमाणपत्र असलेल्या पोल्ट्री व्यावसायिकांचीच नोंदणी केली जाणार होती. दरम्यान, सर्वोच्च न्यायालयाने एका याचिकेवर सुनावणी करताना पोल्ट्री व्यवसायासाठी प्रदूषण नियंत्रण मंडळाकडे नोंदणीला स्थगिती दिली आहे. या निर्णयाच्या अधीन राहत पशुसंवर्धन विभागाकडे पोल्ट्री शेडची नोंदणी करावी, अशी स्पष्ट सूचनाही आयुक्‍तांनी पत्रातून दिली आहे.