नांदेड : नांदेड जिल्ह्यात ‘लम्पी स्कीन’ बाधित (Lumpy Skin Disease)पशुधनाची (Livestock) संख्या १५५ झाली आहे. तर नऊ जनावरांचा यात मृत्यू झाला आहे. जिल्हा प्रशासनातर्फे लसीकरणावर (Lumpy Vaccination)अधिक भर दिला आहे.

मंगळवारी (ता. २७) जिल्हाभर लसीकरणावर भर देऊन १३ हजार २९० जनावरांचे लसीकरण करण्यात आले. आजवर जिल्ह्यात दोन लाख ४९ हजार १४३ पशुधनाचे प्रागतिक लसीकरण पूर्ण झाले आहे.लम्पी स्कीन हा आजार गोठ्यातील अस्वच्छता,

पशुधनाच्या अंगावरील गोचिड व इतर कीटकांमुळे होण्याचा संभव अधिक असतो. हे लक्षात घेऊन जिल्हा प्रशासनातर्फे ग्रामपातळीवर जाऊन मोठ्या प्रमाणात जनजागृती केली जात आहे. आजच्या घडीला नांदेड जिल्ह्यातील ४२ गावे ‘लम्पी’बाधित आहेत.

या ४२ गावात एकूण १९ हजार ९५७ एवढी जनावरांची संख्या आहे. यातील १५५ बाधित जनावरांना वेगळे काढून त्यांच्यावर उपचार केले जात आहेत. बाधित गावाच्या पाच किलोमीटर परिघातील गावांची संख्या २७० आहे. एकूण गावे ३१२ झाली आहेत.

या बाधित ४२ गावांच्या पाच किलोमीटर परिघातील ३१२ गावांतील ८७ हजार ९८० जनावरांची संख्या आहे. उपलब्ध लस मात्रा तीन लाख ७८ हजार असून पशुपालकांनी घाबरून न जाता आपल्या पशूची स्वच्छता, गोठ्यातील स्वच्छता व पशुवैद्यकीय अधिकारी यांनी सांगितल्याप्रमाणे काळजी घ्यावी, असे आवाहन जिल्हाधिकारी खुशालसिंह परदेशी यांनी केले आहे.