Nagpur News : जिल्ह्यात ‘लम्पी स्कीन’चा प्रादुर्भाव वाढता असून, गेल्या दोन दिवसांत सुरुवातीला असलेल्या ६७ बाधित जनावरांची संख्या बुधवारी (ता. ९) वाढत १३८ वर पोहोचल्याची माहिती पशुसंवर्धन विभागाच्या वतीने देण्यात आली.

सावनेर तालुक्‍यात बाधित जनावरांची संख्या सर्वाधिक असल्याचे सांगण्यात आले. पशुसंवर्धन विभागाच्या वतीने लम्पी स्कीनचा प्रादुर्भाव होण्याची शक्‍यता लक्षात घेता खबरदारीच्या उपायांतर्गत यापूर्वीच लसीकरणावर भर देण्यात आला होता.

त्यानुसार १ लाख ९६ हजार गायवर्गीय जनावरांचे लसीकरण आजवर झाले असून नव्याने दोन लाख लस मात्र जिल्ह्याला उपलब्ध झाल्या आहेत.

‘‘नवीन जन्माला येणाऱ्या वासरांची प्रतिकारशक्‍ती कमी असल्यामुळे त्यांच्यामध्ये ‘लम्पी’चा प्रादुर्भाव दिसून येत असल्याचे निरीक्षण नोंदविण्यात आले आहे.

बाधित जनावरांची संख्या वाढती असली तरी पशुसंवर्धन विभाग परिस्थितीवर लक्ष ठेवून आहे. त्याअंतर्गत उपचार होत असल्याने सध्या जिल्ह्यात एकही दगावल्याची केस नोंदविण्यात आली नाही,’’ असे नागपूरचे सहायक आयुक्‍त (पशुसंवर्धन) युवराज केने यांनी सांगितले.