मराठवाड्यात २९ सप्टेंबर पर्यंत सरासरी एवढा तर ३० ते ६ ऑक्टोबर दरम्यान सरासरी एवढा पाऊस राहण्याची शक्यता आहे. बाष्पोत्सर्जनाचा वेग वाढलेला आहे. वसंतराव नाईक मराठवाडा कृषी विद्यापीठाने विविध पिकासाठी पुढील प्रमाणे कृषी हवामान आधारीत कृषी सल्ल्याची शिफारस केली आहे. 

- संत्रा/मोसंबी बागेत फळ वाढीसाठी व फळगळ होऊ नये म्हणून 00:५२:३४ १५०० ग्रॅम व जिब्रॅलिक ॲसिड १ ग्रॅम प्रति १०० लिटर पाणी या प्रमाणे फवारणी करावी. 

- डाळिंब बागेत रोगाच्या व्यवस्थापनासाठी बोर्डो मिश्रण (०.५ % ) किंवा कॉपर ऑक्सीक्लोराईड (५० % डब्ल्यूपी) २.५ ते ३ ग्रॅम प्रति लिटर किंवा कॉपर हायड्रॉक्साईड (५३.०८ %) २ ते २.५ ग्रॅम प्रति लिटर + स्प्रेडर स्टिकर ०.३ ते ०.५ मिली प्रति लिटर याप्रमाणे फवारणी करावी. डाळिंब बागेत फळवाढीसाठी ००:५२:३४ १५०० ग्रॅम व जिब्रेलिक ॲसिड १ ग्रॅम प्रति १०० लिटर पाणी या प्रमाणे फवारणी करावी. चिकू बागेत आंतरमशागतीची कामे करून तण नियंत्रण करावे.

भाजीपाला पिकात आंतरमशागतीची कामे करून तण नियंत्रण करावे. मिरची, वांगी व भेंडी पिकात रसशोषक किडीचा प्रादुर्भाव दिसून येत असल्यास व्यस्थापनासाठी पायरीप्रॉक्सीफेन (५ %) + फेनप्रोपाथ्रीन (१५ %) १० मीली किंवा डायमेथोएट (३० %) १३ मिली प्रती १० लिटर पाण्यात मिसळून फवारणी करावी. काढणीस तयार असलेल्या भाजीपाला पिकाची काढणी करावी.

चाऱ्यासाठी लागवड केलेल्या संकरीत नेपियर पिकाची  पहिली कापणी ६५ ते ७० दिवसांनी तर नंतरच्या कापण्या ४० ते ४५ दिवसानी (७ ते ८ कापण्या) कराव्यात.