Amaravati News : विधानसभा निवडणूक आचारसंहितेच्या अनुषंगाने बांधकाम विभागात धावपळ सुरू असून बांधकाम विभागाकडून ४८ कोटींच्या कामांना हिरवी झेंडी देण्यात आली आहे. २०२४-२५ या आर्थिक वर्षातील ‘क’ वर्ग तीर्थक्षेत्र, ग्रामीण मार्ग व इतर जिल्हा मार्गातील कामे या निधातून केली जाणार आहेत.

विशेष म्हणजे मान्यता देण्यात आली तरी आचारसंहितेमुळे निविदाप्रक्रिया मात्र खोळंबली आहे. त्यामुळे किमान महिनाभर तरी ही कामे थंडबस्त्यात पडणार आहेत.

जिल्हा परिषद बांधकाम विभागाला २०२४-२५ या आर्थिक वर्षात जिल्हा नियोजन समितीमार्फत जिल्हा वार्षिक योजनेतून ग्रामीण भागातील ‘क’वर्ग तीथक्षेत्र विकासाचे १०२ कामांसाठी जवळपास १२ कोटी ३०-५४ लेखाशीर्षाअंतर्गत ग्रामीण मार्गांच्या ८० कामांसाठी २१ कोटी ४५ लाख आणि ५०-५४ या लेखाशीर्षाअंतर्गत इतर जिल्हा मार्गांच्या ३७ कामांसाठी १४ कोटी १४ लाख, असा जवळपास ४७ कोटी ५९ लाख रुपयांचा निधी उपलब्ध करून देण्यात आला.

प्रशासकीय मान्यतेसाठी कार्यकारी अभियंता दिनेश गायकवाड यांनी प्रस्ताव वरिष्ठांना सादर केला. त्यामुळे प्रशासकीय मान्यता प्रदान करण्यात आली.

मात्र मंगळवारी (ता. १५) दुपारी आचारसंहिता लागू झाल्याने ४७ कोटींची कामे खोळंबणार आहेत. त्यामुळे आचारसंहिता संपेपर्यंत तरी ही कामे सुरू होण्याची शक्यता नाही.