Nashik News : नाशिक जिल्ह्यातील १११ निर्यातक्षम द्राक्ष उत्पादक शेतकऱ्यांकडून शेकडो क्विंटल द्राक्ष खरेदी करून ठरलेली रक्कम न देता फसवणूक केल्याप्रकरणी मुख्य संशयित महिलेस वणी पोलिस ठाण्याच्या पथकाने दिल्ली येथील इंदिरा गांधी आंतरराष्ट्रीय विमानतळावर अटक केली.

सोनजांब (ता. दिंडोरी) येथील निर्यातक्षम द्राक्ष उत्पादक शेतकरी दशरथ रामचंद्र जाधव (वय ६५) यांच्या शेतातील थॉम्सन वाणाची द्राक्ष खरेदी पूर्वा चव्हाण हिने केली होती. व्यवहारापोटी दशरथ जाधव व साक्षीदार यांचे ५४ लाख ८५ हजार १५० रुपयांचे थकित पैसे मिळत नव्हते.

अखेर पूर्वा अनिल चव्हाण या मुख्य संशयितासह साथीदारांनी फसवणूक केल्याची फिर्याद वणी पोलिस ठाणे येथे दाखल होती. त्यानुसार गुन्हा दाखल करण्यात आला होता. या गुन्ह्यातील मुख्य आरोपी पूर्वा अनिल चव्हाण ही उच्चशिक्षित आहे.

शेतकऱ्यांची फसवणूक करणारी संशयित पूजा चव्हाण हिच्यावर कारवाई करावी व शेतकऱ्यांना न्याय मिळावा याबाबत द्राक्ष बागायतदार संघाचे अध्यक्ष कैलास भोसले व नाशिक विभागीय अध्यक्ष बाळासाहेब गडाख, तसेच संचालक मंडळाने उपमुख्यमंत्री अजित पवार यांच्याकडे पाठपुरावा केला होता.