Yavatmal News: आत्महत्याग्रस्त शेतकरी कुटुंबातील महिलांचा सिंदूर पुसला गेला, म्हणून रामटेक ते दीक्षाभूमी आणि हिंगोली ते नांदेड अशी ‘सिंदूर यात्रा’ काढण्यात येईल, असा इशारा प्रहार जनशक्ती पक्षाचे अध्यक्ष, माजी मंत्री बच्चू कडू यांनी दिला आहे.

यवतमाळ जिल्ह्यातील गहुली येथे स्व. वसंतराव नाईक यांच्या स्मृतिस्थळावरून मंगळवारी (ता. २९) श्री. कडू बोलत होते. त्यांनी सांगितले, की सरकारला अनेकदा कर्जमाफीसंदर्भात विनंती करूनही दखल घेतली जात नसल्याने आता आंदोलनाची धार अधिक तीव्र केली जाईल.

राज्यातील विविध भागांतून शेतकऱ्यांच्या मागण्या दिवसेंदिवस तीव्र होत आहेत. त्यातच कर्जमाफीचा मुद्दा पुन्हा ऐरणीवर आला असून, सरकारच्या धोरणांविरोधात आता रस्त्यावरची लढाई अधिक तीव्र होणार असल्याचे स्पष्ट झाले आहे.

मंगळवारी श्री. कडू यांनी राज्यभरातून आलेल्या विविध शेतकरी प्रतिनिधी, पदाधिकारी, कार्यकर्ते यांच्याशी संवाद साधला. त्यानंतर सर्वांच्या सहमतीने आंदोलनाची दिशा निश्‍चित करण्यात आली. बैठकीच्या पूर्वी कार्यकर्त्यांनी रक्तदान केले.

दोन ऑक्टोबरपासून ‘भगतसिंगगिरी’

बच्चू कडू यांनी स्पष्ट केले, की येत्या २ ऑक्टोबरपासून गांधीगिरी सोडून ‘भगतसिंगगिरी’ सुरू होईल. याच दिवशी गावागावांतून ट्रॅक्टर मोर्चे निघतील आणि शेवटी ते विधानभवनावर धडकतील. शेतकऱ्यांचा आवाज आता ऐकून घेणे सरकारला भाग पडेल, असा रोखठोक इशाराही त्यांनी दिला.