Malinagar News : पंतप्रधान कृषी सिंचन पाणलोट घटक योजना महाराष्ट्रात जानेवारी २०२१ पासून सुरू झाली. परंतु, या योजनेचे शेवटचे वर्ष संपत आले तरी गाळात रुतलेले चाक प्रशासनातील झारीतील शुक्राचार्य असलेल्या काही अधिकाऱ्यांच्या अतिअनुत्साही प्रवृत्तीमुळे जागचे हलेना.

योजना अंमलबजावणीकरिता पुणे येथील वसुंधरा कार्यालयास चार वर्षांपासून अपर मुख्य कार्यकारी अधिकारी मिळेना. मुख्य कार्यकारी अधिकारी यांचे कार्यालय छत्रपती संभाजीनगर येथे असल्याने तेही या योजनेकडे पुरेसे लक्ष व वेळ देण्यास असमर्थ आहेत.

बहुतेक करून योजना कंत्राटी कर्मचारी वर्गावर चालू आहे. तथापि, प्रशासनातील गतीतला अडथळा असलेले प्रभारी प्रशासन तथा लेखाधिकारी यांचे संथगतीने काम करण्याच्या स्वभावामुळे कंत्राटी कर्मचाऱ्यांचे पगार तीन-तीन महिने होत नाहीत.

त्यामुळे ज्यासाठी काम करतो तो पगारच मिळत नसल्याने कर्मचाऱ्यांना काम कसे करावे, यावर एखाद्या विद्यापीठाची पीएच.डी. होईल एवढा वाईट अनुभव कंत्राटी कर्मचाऱ्यांना येत आहे.

क्षेत्रीय कार्यालयांची परिस्थिती अत्यंत गंभीर आहे. मात्र, त्याकडे लक्ष देण्यासाठी जलसंधारण विभागाच्या अधिकाऱ्यांना वेळ नाही व त्यांच्याकडे तेवढी यंत्रणादेखील नाही.