Solapur News : सोलापूरसह पुणे व नगर जिल्ह्यांसाठी वरदान ठरलेल्या उजनी धरणात सध्या ५६ टक्के पाणीसाठा आहे. यंदाच्या पावसाळ्यात केवळ पुण्याकडील पावसावर धरण ६१ टक्क्यांपर्यंत भरले, पण सध्या पाणीपातळीत हळूहळू घट होत आहे. असे असले तरी ऊस, डाळिंब, कांदा या प्रमुख पिकांसह अन्य पिकांसाठी सातत्याने पाण्याच्या होत असलेल्या मागणीनुसार शेतीसाठी पहिले आवर्तन एक नोव्हेंबरपासून सोडले जाणार आहे.

खरीप हंगामात पावसाळा सुरू असतानाही जिल्ह्यात सर्वदूर समाधानकारक पाऊस झालेला नाही. त्यामुळे जिल्ह्यातील बार्शी, करमाळा, माढा, माळशिरस व सांगोला हे पाच तालुके दुष्काळाच्या यादीत समाविष्ट झाले आहेत. त्या वेळी पिकांसाठी पाणी सोडण्याची मागणी झाली, पण उजनी धरणातील उपयुक्त पाणीसाठा ३३ टक्क्यांपेक्षा कमी असल्याने पाणी सोडता आले नाही.

आता रब्बी पिकांसाठी उजनीतून दोन आवर्तने सोडली जाणार आहेत. १ नोव्हेंबर ते १० डिसेंबरपर्यंत पहिले आवर्तन सुटेल आणि त्यासाठी किमान ८ टीएमसी पाणी लागेल, असा अंदाज आहे. सोलापूर शहरासाठी भीमा नदीतून पाणी सोडल्यानंतर पुन्हा कॅनॉलमधून शेतीला पाणी सोडण्यास अडचणी येतात.

त्यामुळे एक महिन्याच्या अंतराने साधारण जानेवारीमध्ये दुसरे आवर्तन शेतीसाठी सोडण्याचे नियोजन करण्यात आले आहे. सध्या वरच्या धरणाकडून येणारे पाणी कमी झाल्यामुळे आणि आर्द्रतेमुळे पाणीसाठ्यात घट होत आहे.

शनिवारी (ता. २८) धरणात एकूण पाणीसाठा ४९४.६७५ मीटर आहे. एकूण एकूण पाणीसाठा ९३.९२ टीएमसी आहे, तर त्यापैकी उपयुक्त साठा ३०.२६ टीएमसी एवढा आहे. तर या पाण्याची टक्केवारी ५६.४९ टक्के आहे.