Sangli News : : म्हैसाळ योजनेचे पाणी माडग्याळ शिवारात दाखल झाले आहे. ओढ्याच्या पात्रातून पाण्याचा प्रवाह मोठ्या प्रमाणात सुरू आहे. हे पाणी निगडी येथील दोड्डानाला मध्यम प्रकल्पात जाणार आहे.

अजूनही पाण्याचा विसर्ग म्हैसाळ योजनेच्या अधिकाऱ्याने जादा सोडावा तरच या मध्यम प्रकल्पात पाणी लवकर जाऊ शकते, असे शेतकऱ्यांचे म्हणणे आहे. माडग्याळ परिसरात पाण्याची तीव्र टंचाई सुरू होती. जनावरांच्या पाण्याचा प्रश्न जटिल बनला होता.

या भागातील सर्व विहिरी कोरड्या ठणठणीत होत्या. बोरवेलचे पाणीही कमी झाले आहे. बऱ्याच ठिकाणी बोरवेल्स कोरड्या ठणठणीत आहेत. त्यामुळे पाण्याची टंचाई या परिसरात जाणवत होती.

म्हैसाळच्या अधिकाऱ्यांकडे वेळोवेळी मागणी करूनही या भागात पाणी येत नव्हते. जत पूर्व भागात बऱ्याच गावांना टॅंकरने पाणीपुरवठा सुरू आहे. सध्या पाण्याचा उद्धव फक्त दोडानाला मध्यम प्रकल्पाखालील विहिरींनाच आहे. त्यामुळे या भागातील टँकर या प्रकल्पातून पाणी घेऊन जात होते.

त्या ठिकाणीही पाण्याचा उद्भव कमी झाला होता. त्यामुळे पाण्याची टंचाई जाणवत होती. याची जाणीव ठेवून म्हैसाळच्या अधिकाऱ्याने या परिसरात पाणी सोडले आहे. माडग्याळच्या शिवारात पाणी दाखल झाले आहे. ओढापात्रातून पाणी वाहू लागले आहे. माडग्याळचा दोडकल तलाव भरल्यानंतर सोन्याळच्या शिवारात पाणी जाते. तिथून दोड्डानाला प्रकल्पात पाणी जाते.