Sangli News : तालुक्यातील ४९ पाझर तलावांच्या पाणीसाठ्यात तीव्र उन्हाळ्यामुळे मोठ्या प्रमाणात घट होऊ लागली आहे. ४९ पाझर तलावांपैकी करमाळे नंबर १ व पाचुंब्री तलावाचे साठवण तलावात रूपांतर करण्याचे काम सुरू आहे. त्यामुळे ४९ पैकी ४७ तलावांपैकी हत्तेगाव येथील तलावात ९५ टक्के पाणीसाठा असून, १० तलाव कोरडे पडले आहेत.

दोन तलावांत ९०, एका तलावात ८५, तर ३ तलावांत ५० टक्के पाणीसाठा आहे. उन्हाची दाहकता व तीव्रता दिवसेंदिवस वाढू लागल्याने धरण, विहिरी, कूपनलिका यांच्या पाणी पातळीत दिवसेंदिवस मोठ्या प्रमाणात घट होण्यास सुरुवात झाली आहे. त्यामुळे अनेक ठिकाणी शेतीच्या व जनावरांच्या पिण्याच्या पाण्याची टंचाई वाढू लागली आहे. मार्चअखेर मोठ्या प्रमाणात पाणीपातळी घटणार असून, पाणीटंचाईची समस्या भेडसावणार आहे.

तालुक्यातील इतर तलावांचे नाव व कंसात पाणीसाठा टक्केवारी अशी : हत्तेगाव (९५), प. त. शिराळा नंबर-१, पाडळी (९०), खिरवडे (८५), भटवाडी, वाडीभागाई बिऊर (७५), वाकुर्डे बुद्रुक जामदाड कुरण, बादेवादी वाकुर्डे बुद्रुक, अंत्री खुर्द, निगडी महारदरा, कापरी, तडवळे नंबर-१ (७०), गवळेवाडी उंदीर खोरा, गवळेवाडी बहिरखोरा, वाकुर्डे खुर्द, पाडळेवाडी (६५), औंढी (५५), शिरसटवाडी, खेड,

रेड क्रमांक २ (५०), मेणी (सांकृबी नाला, बेलदारवाडी, तडवळे वाडदरा (४५), येळापूर (चव्हाणवाडी), करमाळे नंबर-‍२ (४०), आटुगडेवाडी (मेणी), धामवडे (कुंडनाला), लादेवाडी (३५), कोंडाईवाडी नंबर-१ व २ शिरशी (कासारकी), प. त. शिराळा. नंबर-२, पावलेवाडी नंबर-१ व २ (२५) पाचुंब्री (२०), चरणवाडी नंबर-१, भाटशिरगाव (१५). दरम्यान, हत्तेगाव तलावात वाकुर्डे योजनेतून पाणी सोडल्याने तलावात ९५ टक्के पाणीसाठा आहे.

...येथे जाणवतेय टंचाई

सावंतवाडी, शिरशी नंबर-१, शिरशी भैरवदरा आणि काळेखिंड, शिवरवाडी, भैरेवाडी, निगडी जुना कासारदरा, निगडी खोखडदरा, करमाळा नंबर-१, इंगरूळ हे दहा तलाव कोरडे पडले आहेत. त्यामुळे या परिसरातील जनावरांना पिण्याच्या पाणीटंचाईला सामोरे जावे लागत आहे.