Solapur News : सद्यःस्थितीत जिल्ह्याच्या काही तालुक्यात पाणीटंचाईची परिस्थिती आहे. या अनुषंगाने जवळपास ६४ टँकरद्वारे पाणीपुरवठा केला जात आहे. टंचाई कृती आराखड्यातील विविध प्रकारच्या ९ उपाय योजनांद्वारेही प्रशासन टंचाईवर मात करण्याचा प्रयत्न करत आहे.

तरीही जिल्ह्याच्या कोणत्याही भागातून नागरिकांनी पाण्याच्या टँकरची मागणी केल्यानंतर प्रशासनाने ४८ तासांच्या आत टँकर सुरू करावा, असे निर्देश ग्रामविकास व पंचायत राज्यमंत्री तथा पालकमंत्री जयकुमार गोरे यांनी दिले.

टंचाई आढावा बैठकीत पालकमंत्री गोरे बोलत होते. या वेळी खासदार प्रणिती शिंदे, खासदार धैर्यशील मोहिते पाटील, खासदार ओमराजे निंबाळकर, जिल्हाधिकारी कुमार आशीर्वाद, मुख्य कार्यकारी अधिकारी कुलदीप जंगम, आमदार सर्वश्री सुभाष देशमुख, देवेंद्र कोठे, समाधान आवताडे, सचिन कल्याणशेट्टी, राजू खरे, अभिजित पाटील, डॉ. बाबासाहेब देशमुख, नारायण पाटील, अपर जिल्हाधिकारी मोनिका सिंह ठाकूर, निवासी उपजिल्हाधिकारी गणेश निरहाळी, उपजिल्हाधिकारी महसूल संतोष कुमार देशमुख उपस्थित होते.

पालकमंत्री गोरे म्हणाले, की टंचाईच्या अनुषंगाने नागरिकांनी मागणी केल्यास ४८ तासांत प्रशासनाने टँकर सुरू करावा, सर्व तहसीलदार, गटविकास अधिकारी व उपविभागीय अधिकारी यांनी त्यांच्या कार्यक्षेत्रात पिण्याच्या तसेच वापराच्या पाण्याची टंचाई भासणार नाही,

या अनुषंगाने काटेकोरपणे नियोजन करावे. टंचाई उपयोजनेअंतर्गत पाण्याचे विविध स्रोत याची माहिती संबंधित यंत्रणांनी अगोदरच घेऊन ठेवावी जेणेकरून टंचाई निवारणार्थ उपाययोजना राबवताना त्या गतिमान पद्धतीने राबवणे शक्य होणार असल्याचेही त्यांनी सांगितले. प्रारंभी उपजिल्हाधिकारी देशमुख यांनी जिल्हा प्रशासनाने टंचाई कृती आराखड्या अंतर्गत राबविण्यात आलेल्या विविध ९ उपाययोजना ची माहिती दिली.