Sindhudurg News : अरबी समुद्रात तयार झालेल्या कमी दाबाच्या क्षेत्राचे बिपरजॉय चक्रीवादळात रूपांतर झाल्यामुळे जिल्हा प्रशासनाने सिंधुदुर्गात दक्षतेचा इशारा दिला आहे. मच्छीमारांनी मासेमारीसाठी समुद्रात जाऊ नये, असे आवाहन केले आहे.

दरम्यान बुधवार (ता. ७) सायकांळपासूनच समुद्राच्या पाणीपातळीत अचानक वाढ झाल्यामुळे मालवण येथील मच्छीमारांची चांगलीच ताराबंळ उडाली.

अरबी समुद्रात तयार झालेल्या कमी दाबाच्या क्षेत्राचे बुधवारी बिपरजॉय चक्रीवादळात रूपांतर झाल्याचे हवामान विभागाकडून स्पष्ट करण्यात आले. या चक्रीवादळाचा प्रभाव बुधवार दुपारपासूनच जाणवण्यास सुरुवात झाली. दुपारी दीडच्या सुमारास समुद्राच्या पाणीपातळीच अचानक वाढ झाली. त्यामुळे मच्छीमारांची चागंलीच दमछाक झाली.

मासेमारी नौका, जाळ्या सुरक्षित स्थळी हलविताना मच्छीमारांची धावपळ झाली. काही मच्छीमारांची जाळी वाहूनदेखील गेली. दरम्यान गुरुवार ते शनिवार (ता. १०) या कालावधीत चक्रीवादळ अधिक त्रीव होणार आहे.

या कालावधीत अरबी समुद्रात ताशी १०५ ते १५० किमी वेगाने वारे वाहण्याची शक्यता आहे तर किनारपट्टीला ताशी ५० ते ६० किमी वेगाने वारे वाहण्याची शक्यता आहे. याशिवाय पाऊसदेखील पडण्याची शक्यता आहे.

समुद्राला उधाणाची स्थिती येणार असून लाटांची उंची अधिक असणार आहे. त्यामुळे या कालाधीत मच्छीमारांनी समुद्रात मासेमारीकरिता जाऊ नये, असे आवाहन प्रशासनाकडून करण्यात आले आहे.