Solapur News : पिंपळनेर येथील विठ्ठलराव शिंदे सहकारी साखर कारखान्याचे युनिट नंबर एक पिंपळनेर व युनिट नंबर दोन करकंब कारखान्याचे ११ ते २० जानेवारी अखेर प्रतिटन २८०० रुपयांप्रमाणे ऊस बिल शेतक-यांच्या बॅंक खात्यात जमा करण्यात आले आहे.

या हंगामात आजपर्यंत ऊस बिलापोटी ३३२ कोटी ७६ लाख रुपयांचे वाटप केले असल्याची माहिती साखर कारखान्याचे संस्थापक अध्यक्ष, बबनराव शिंदे यांनी पत्रकारांना दिली. श्री. शिंदे म्हणाले, या हंगामात युनिट नंबर एककडे प्रतिदिन चौदा ते साडे चौदा हजार व युनिट नंबर दोनकडे साडेचार ते पाच हजार मेट्रिकटन गाळप होत आहे.

युनिट नंबर एक येथे आतापर्यंत ८ लाख ८८ हजार मेट्रीकटन ऊस गाळप झाले आहे. युनिट नंबर २ येथे आतापर्यंत ३ लाख मेट्रिकटन उसाचे गाळप झालेले आहे. दोन्ही युनिटचे मिळून ११ लाख ८८ हजार ४३२ मेट्रिकटन उसाचे गाळप झाले आहे.

या गळीत हंगामामध्ये युनिट नंबर एक पिंपळनेर व युनिट नंबर दोन करकंबकडे ११ ते २० जानेवारी या कालावधीत गाळपास आलेल्या सहाव्या १० दिवसाच्या उसास प्रतिटन २८०० रुपयेप्रमाणे पेमेंट शेतकऱ्यांच्या-यांच्या बँक खात्यात जमा करण्यात आले आहे.

या हंगामात आतापर्यंत कारखान्याने ऊस बिलापोटी ३३२ कोटी ७६ लाख रुपये अदा केले आहेत. ३१ डिसेंबर अखेर ऊस तोडणी वाहतूक बिलेही अदा करण्यात आलेली असून उर्वरित बिले अदा करणेची दृष्टीने कार्यवाही सुरू आहे, असेही ते म्हणाले.

यावेळी कारखान्याचे उपाध्यक्ष वामनराव उबाळे, कार्यकारी संचालक एस.एन.दिग्रजे, जनरल मॅनेजर एस.आर.यादव व इतर अधिकारी उपस्थित होते.