Sangli News : वाळवा तालुक्यात पशुसंवर्धन विभागात मनुष्यबळ कमी असतानासुद्धा सहकारी दूध संघ, खासगी पशुवैद्यांच्या मदतीने तालुक्यातील दीड लाखावर पशुधनाचे पावसाळ्यापूर्वीचे लसीकरण युद्ध पातळीवर सुरू आहे. आतापर्यंत ४० हजारांवर जनावरांचे लसीकरण झाल्याची महिती तालुका पशुसंवर्धन विभागामार्फत देण्यात आली.

वाळवा तालुक्यात २४ पशु वैद्यकीय दवाखाने आहेत. काही पशु वैद्यकीय केंद्र पशु वैद्यकांअभावी बंद आहेत. घटसर्प, फऱ्या, लम्पी स्कीन आजारांचे लसीकरण, पूरस्थिती, उपचाराअभावी तालुक्यातील पशुधन धोक्यात येण्याची शक्यता असल्याने पशुवैद्यकीय अधिकाऱ्यांनी सहकारी दूध संघ, खासगी पशुवैद्यकांशी समन्वय साधत जनावरांचे पावसाळ्यापूर्वी आवश्यक लसीकरण ५० टक्केवर पूर्ण करण्यात यश मिळवले आहे.

तालुक्यात १६ दवाखान्यांत पशुवैद्यकीय सुविधा सुरुवातीस राबविण्यात येत होती. पंचायत समितीमार्फत ८ गावांत पशुवैद्यकीय सुविधा राबविण्यात येत होती. राज्य शासनाच्या केंद्रात १ पशु वैद्यकीय डॉक्टर व ३ पशुधन पर्यवेक्षक उपलब्ध असून बाकी केंद्रात १२ पदे रिक्त आहेत. पंचायत समितीची आठ केंद्रे सुरू आहेत. ६ पशुधन विकास अधिकारी, २ पशुधन पर्यवेक्षक आहेत. पशुधन विकास अधिकारी व पशुधन पर्यवेक्षक अशी ४ पदे रिक्त आहेत.

पशुधन १ लाख ५० हजार व पशुवैद्यकीय संख्या ११ आहे. डॉक्टरांवर कामाचा ताण येत असल्याने आवश्यक त्या वेळी ते उपलब्ध होऊ शकत नाहीत. शेतकरी भरडला जाऊ लागला आहे. काही ठिकाणी दोन, काही ठिकाणी पाच वर्षे झाली तरी डॉक्टर उपलब्ध नाहीत. याकडे प्रशासन गांभीर्याने बघताना दिसत नाही. काही वेळेस जनावरांच्या गंभीर आजाराचे निदान लागत नाही. योग्य वेळी योग्य उपचार होत नाहीत. अंदाज बांधून उपचार केले जातात. ते पशुधनाच्या जिवावर बेततात.

वाळवा तालुक्यात एकूण जनावरांची संख्या : १ लाख ५८ हजार ५९३

फऱ्या, घटसर्प, लम्पी स्कीन या आजारांना प्रतिबंध म्हणून वाळवा तालुक्यासाठी पशुसंवर्धन विभागाकडून ८३ हजार ८० लसींचे डोस उपलब्ध

आतापर्यंत ४० हजार ३९७ (डोस) जनावरांना लस देण्यात आले.

आजार मिळालेले डोस झालेले लसीकरण

घटसर्प / फऱ्या ३३,९८० १६,८१४

लम्पी २३,५०० १४,६८२

पिपीआर १६,४०० ६,२४७

आंत्रविषार ४,५०० २,१८२