Palghar News : डहाणूत वाणगाव कृषी मंडळातून ५६१.१८ हेक्टरवर उन्हाळी भातशेती कापणीयोग्य झाली आहे. सातत्याने हवामानाच्या बदलामुळे व पावसाच्या अनिश्चित स्वरूपामुळे शेतकऱ्यांना नुकसानीचा सामना करावा लागत आहे.

मे महिन्याच्या पहिल्या आठवड्यात अवकाळी पावसाने धुमाकूळ घातल्याने भातशेतीचे मोठ्या प्रमाणात नुकसान झाले. कापणीयोग्य झालेले भातपीक शेतात आडवे झाले होते. त्यामुळे शेतकऱ्यांची कापणी लांबली आहे. सध्या ढगाळ वातावरण आणि पावसाची चिन्हे असल्याने डहाणूतील शेतकरीवर्ग भातकापणीच्या जोरदार तयारीला लागला आहे.

डहाणू तालुक्यात धामणी आणि कवडास या दोन धरणांचा पाणीपुरवठा होत असल्याने उन्हाळ्यात सारणी, घोळ, भराड, रानशेत, वधना, पिंपळशेत, म्हसाड, नानिवली, ऊर्से, सोनाळे या भागातील शेतकऱ्यांनी उन्हाळी भातशेती केली आहे.

कालवा दुरुस्तीमुळे फटका

डहाणू तालुक्यात दरवर्षी मोठ्या प्रमाणात उन्हाळी भातशेती केली जाते; परंतु यंदा कालव्याच्या दुरुस्तीमुळे कासा मंडळातील गावे उन्हाळी भातशेतीपासून वंचित राहिली आहेत. यंदा कालव्याच्या दुरुस्तीमुळे कासा मंडलातील शेतकऱ्यांना उन्हाळी भातशेती करता आली नसल्याचे कृषी विभागाच्या वतीने सांगण्यात आले.

अवकाळीमुळे शेतीचे नुकसान

नुकतेच अवकाळी पावसाने डहाणूला उन्हाळी भातशेतीचे नुकसान केल्याने शेतकरी चिंतेत आहेत; सद्यःस्थितीतही ढगाळ वातावरण आणि पावसाचे वातावरण असल्याने शेतकरी सकाळी भातशेतीची कापणी करून दुपारपर्यंत भात कापून पीक घरी साठवणूक करीत आहेत.