Pune News : राज्यातील विविध जिल्ह्याच्या ग्रामीण भागात रस्त्यांची दुरावस्था झाली असून काही ठिकाणी अद्याप रस्त्याच नाही. अशा ठिकाण प्रधानमंत्री ग्राम सडक योजनेअंतर्गत नव्या रस्त्यांची निर्मिती केली जाणार असून ६५५ कोटींचा निधी दिल्याची माहिती केंद्रीय ग्रामीण विकास मंत्री शिवराज सिंह चौहान यांनी दिली आहे. तसेच केरळसह मध्य प्रदेशमधील ग्रामीण रस्त्यांनाही मंजुरी देण्यात आली आहे.

राज्यासाठी ६५५.६६ कोटींचा निधी

राज्यातील विविध जिल्ह्याच्या ग्रामीण भागात अनेक रस्ते खराब झाले आहेत. तर काही ठिकाणी रस्तेच नाहीत. त्यामुळे ग्रामीण विकासावर परिणाम झाला आहे. गावे, वाड्यांना जोडणारे रस्‍ते तयार करून ग्रामीण भागाचा विकास करण्यासाठी केंद्रीय ग्रामीण विकास मंत्रालयाकडून प्रधानमंत्री ग्राम सडक योजनेअंतर्गत नवे रस्ते केले जाणार आहेत. राज्यात नव्या ७४५ किमी. च्या ११७ रस्त्यांना मंजुरी देण्यात आली आहे. तर यासाठी ६५५.६६ कोटींचा निधी मंजूर करण्यात आला आहे. या नव्या रस्त्यांमुळे राज्यातील ग्रामीण भागातील रस्त्यांचे जाळे अधिक मजबूत होण्यास मदत मिळणार आहे.

मध्य प्रदेशात नवे ६० रस्ते

मध्य प्रदेशातही प्रधानमंत्री ग्राम सडक योजनातंर्गत ११३.५८ कोटी रुपये मंजूर करण्यात आले आहेत. तर येथे १५२.४४ किमी लांबीचे ६० रस्ते होणार आहे.

केरळमध्ये ११ पूल

केरळ राज्यात प्रधानमंत्री ग्राम सडक योजना-३ अंतर्गत ११ पुलांच्या बांधकामाला मंजुरी देण्यात आली आहे. यासाठी ५५.२८ कोटी रुपये खर्च केले जाणार आहेत.

ग्राम सडक योजना - ४ नेसाठी ७० हजार १२५ कोटी

तसेच पंतप्रधान नरेंद्र मोदी यांच्या अध्यक्षतेखालील केंद्रीय मंत्रिमंडळाने बुधवारी (ता.११) प्रधानमंत्री ग्राम सडक योजना - ४ च्या प्रस्तावाला मंजुरी दिली. जी आर्थिक वर्ष २०२४-२५ ते २०२८-२९ या काळासाठी असेल. प्रधानमंत्री ग्राम सडक योजना - ४ नव्या ६२ हजार ५०० किमी लांबीचे रस्ते बांधण्यासाठी आर्थिक सहाय्य प्रदान केले जाणार आहे. या योजनेचा एकूण खर्च ७० हजार १२५ कोटी रुपये असेल.