Watershed Yatra : केंद्रीय कृषिमंत्री शिवराजसिंह चौहान यांनी पंतप्रधान कृषी सिंचन योजने अंतर्गत वॉटरशेड यात्रेचा बुधवारी (ता.५) शुभारंभ केला. यावेळी यात्रेत लोकांनी सहभागी व्हावं, असं आवाहन कृषिमंत्री चौहान यांनी केलं. देशातील कृषी क्षेत्रातील पाणी आणि मातीचं संवर्धन करण्यासाठी या यात्रेचं आयोजन करण्यात आलं आहे. तसेच या यात्रेतून शेतकऱ्यांमध्ये जनजागृती निर्माण केली जाणार आहे. त्यासाठी केंद्र सरकार प्रयत्न करत असल्याची चर्चा आहे.

कृषिमंत्री म्हणाले, "पाणी आहे तर भविष्य आहे, माती आहे तर जीवन आहे. पाणी घेऊन येईल धनधान्य या संकल्पनेवर आधारित वॉटरशेड यात्रेचं आयोजन करण्यात आलं आहे. यात्रा विविध भागातून जाणार आहे. यात्रेचा उद्देश पाणी आणि मातीबद्दल जनजागृती निर्माण करण्याचा आहे." असं चौहान म्हणाले.

देशातील २६ राज्य आणि २ केंद्रशासित प्रदेशातून ही यात्रा जाणार आहे. ६० ते ९० दिवस चालणाऱ्या यात्रेतून ६ हजार ६७३ ग्राम पंचायत आणि १३ हजार ५८७ गावांचा समावेश करण्यात आला आहे. तसेच १ हजार ५०९ ग्राम सभाचं आयोजन करून १ हजार ६४० प्रभात फेरी काढण्यात येणार आहेत. तर भूमिपूजन, वॉटरशेड महोत्सव, वॉटरशेड महोत्सव, श्रमदान, वॉटरशेड पुरस्कार अशा कार्यक्रमाचं आयोजनही करण्यात आलं आहे.

नीती आयोगाच्या २०२३ च्या आकडेवारीनुसार देशातील सिंचनाखालील क्षेत्र ५५ टक्क्यांवर पोहचलं आहे. मात्र यामध्ये तेलंगणा, आंध्रप्रदेशच्या सिंचनखालील क्षेत्रात वाढ झाली आहे. महाराष्ट्र मात्र अद्यापही सिंचन क्षेत्रात पिछाडीवर आहे. राज्यात १८ टक्के क्षेत्र सिंचनाखाली असून ८२ टक्के क्षेत्र कोरडवाहू आहे. राज्य सरकार नवनवीन योजनांची घोषणा करतं. परंतु वास्तवात मात्र सिंचन क्षेत्रात वाढ होत नाही. धरणाची अवस्था अत्यंत वाईट आहे. तर कालव्याचं पाणी लाभ क्षेत्रापर्यंत पोहचत नाही.

दरम्यान, केंद्र सरकार मात्र पंतप्रधान कृषी सिंचन योजनेतुन सिंचन क्षेत्रात वाढ करत असल्याचा दावा करण्यात येत आहे. त्यासाठी वॉटरशेड यात्रेतून पाण्याचा योग्य वापर आणि मातीचं आरोग्य जपण्यासाठी जनजागृती केली जाणार आहे.