Nanded News : हिमायतनगर तालुक्यात सेंद्रिय खताच्या नावाखाली बनावट खते विनापरवाना विकत असल्याची माहिती पोलिसांना लागताच त्यांनी मालवाहू ठाण्यात लावली. यानंतर कृषी विभागाने कार्यवाही करत हिमायतनगर पोलिस ठाण्यात खत नियंत्रण आदेशानुसार चार जणांविरुद्ध गुन्हा दाखल केला आहे.

हिमायतनगरमधील सरदार मीलजवळ असलेल्या गोडाऊनमध्ये सेंद्रिय खत ध्रुव (७५० बॅगा), हायशक्ती बेनीफीड (२२० बॅगा), ह्युमिक ॲसीड (१२८ बॉटल), गोल्डन ४ जी (७५ बॉटल) असा साठा करून तो तालुक्यात विक्री केला जात होता.

या प्रकरणी हिमायतनगर पोलिसांनी कार्यवाही करत मालवाहू वाहनातील तसेच गोडावूनमध्ये साठा केलेल्या साडेसात लाखांच्या खतासह पाच लाख रुपयाचे वाहन असे एकूण १२ लाख ५९ हजार रुपयांचा मुद्देमाल जप्त केला. ही कारवाई मंगळवारी (ता. २२) रात्री उशिरा करण्यात आली. पोलिसांनी पिकअपसह खताच्या बॅग जप्त केल्या आहेत.

या प्रकरणी तेलंगणातील करुपली मारया व्यंकन्ना, प्रवीण व्यंकया अडेप्पू, मलेश सत्यनारायण बोडला (सर्व राहणार तेलंगणा) व ख्वाजा नसीर ख्वाजा वजीर (रा. हिमायतनगर) यांच्याविरुद्ध कृषी अधिकारी गंगाधर भदेवाड यांच्या फिर्यादीवरून पोलिस ठाण्यात गुन्हा दाखल केला आहे. या प्रकरणी १२ लाख ५९ हजारांचा माल जप्त करण्यात आला आहे.

‘पक्के बिल घेऊनच खरेदी करावी’

जिल्ह्यातील सर्व शेतकऱ्‍यांनी विनापरवाना खते किंवा बियाणे खरेदी करू नये, परवानाधारक वितरक किंवा दुकानदार यांच्याकडूनच पक्के बिल घेऊनच खते व बियाणे खरेदी करावी, असे आवाहन कृषी विभागाकडून करण्यात आले आहे.