Chandrpur News : नागभीड वनपरिक्षेत्रातील वासाडा मक्ता या गावात दोन वाघांची झुंज झाली. या झुंजीत एक वाघ गंभीर जखमी झाला. झुंजीचा हा प्रकार काहींनी याची देही याची डोळा बघितला. दरम्यान, याची माहिती वनविभागाला देण्यात आली. वनविभागाने गंभीर जखमी झालेल्या वाघाचा शोध सुरू केला आहे.

नागभीड वनपरिक्षेत्रातील वासाडा मक्ता हा परिसर येतो. जंगलव्याप्त या भागात वाघ, बिबट्यासह अन्य वन्यप्राण्यांचा वावर असतो. दरम्यान, वासाडा मक्ता या भागात दोन वाघ आमने-सामने आले. वर्चस्वासाठी या दोन्ही वाघांची झुंज झाली. हा प्रकार नागभीड वनपरिक्षेत्रातील कक्ष क्रमांक ७५६ परिसरात घडला.

सकाळी फिरायला जाणाऱ्या अनेकांनी वाघाची झुंज बघितली. दोन वाघांच्या झुंजीत एक वाघ गंभीर जखमी झाला. जखमी अवस्थेतच त्याने तेथून पलायन केले. त्यानंतर नागरिकांनी या घटनेची माहिती वनविभागाला दिली.

माहिती मिळताच वनपरिक्षेत्र अधिकारी, वनकर्मचारी घटनास्थळी आले. घटनास्थळावर मोठ्या प्रमाणावर रक्ताचा सडा दिसून आला. कोणतीही जीवितहानी होऊ नये व जखमी वाघ तत्काळ मिळावा याकरिता वनविभागाने शोधमोहीम सुरू केली आहे. मात्र, अद्यापपर्यंत जखमी वाघ मिळाला नाही.

‘जंगलात जाणे टाळा’

दोन वाघांच्या झुंजीत एक वाघ गंभीर जखमी झाला. वाघ जखमी असल्याने त्याच्या मागे किंवा जंगलात प्रवेश करू नये. या परिसरात कुणीही भटकू नये, असे आवाहन वनविभागाने केले आहे. सध्या जखमी असलेल्या वाघाचा शोध घेणे सुरू आहे.