Amaravati News : जिल्ह्यात दोन नवीन कृषी उत्पन्न बाजार समिती स्थापन करण्याचा शासन आदेश निघाला आहे. असे असले तरी या बाजार समिती स्थापन करण्यात तांत्रिक व प्रशासकीय अडचणी कायम आहेत. दरम्यान, जिल्हा उपनिबंधकांनी प्रशासकीय माहिती संकलित करण्याची प्रक्रिया प्रारंभ केली आहे.

प्रती तालुका बाजार समिती, असे राज्य सरकारचे धोरण अर्थसंकल्पीय अधिवेशनात मंजूर करण्यात आले आहे. अमरावती जिल्ह्यात चौदा तालुक्यांत बारा कृषी उत्पन्न बाजार समित्या आहेत. भातकुली तालुका अमरावती बाजार समितीसोबत संलग्न असून चिखलदरा येथे बाजार समितीच नाही. या भागातील शेतकरी अचलपूर बाजार समितीचा आधार घेतात.

प्रती तालुका बाजार समिती, असा शासन आदेश १७ एप्रिलला निर्गमित झाला आहे. त्यानुसार भातकुली व चिखलदरा, येथे या दोन बाजार समिती प्रस्तावित आहेत. अमरावती बाजार समितीचे विभाजन करून भातकुली बाजार समिती स्थापन करण्यात येणार आहे.

त्यासाठी लागणाऱ्या पायाभूत सुविधा, कर्मचारी संख्या, मतदारयादी, आर्थिक तजवीज उपलब्ध करण्याच्या दृष्टीने माहिती संकलित करण्यास जिल्हा उपनिबंधकांनी सहायक उपनिबंधकांना सांगितले आहे. विभाजनामुळे अमरावती समितीचे उपबाजार व ठेवींचे विभाजन होणार आहे. जिल्ह्यातील सर्वांत मोठी व श्रीमंत बाजार समिती, अशी अमरावती बाजार समितीची ओळख आहे. त्यास यामुळे तडा जाणार आहे.

संचालक मंडळ, मतदारांचे विभाजन

अमरावती बाजार समितीअंतर्गत अठरा सदस्यीय संचालक मंडळात भातकुली व अमरावती तालुक्यातून संचालक निवडून येतात. दोन्ही तालुक्यातील सेवा सहकारी संस्थांचे मतदार त्यांची निवड करतात. नवीन बाजार समितीसाठी संचालक मंडळासह मतदारांचेही विभाजन करावे लागणार आहे. त्यामुळे अमरावती बाजार समितीचा भौगोलिक व आर्थिक आकार कमी होणार आहे.