Sangli News : पावसाने उघडीप दिल्याने वाळवा तालुक्यात हळद लागवडीच्या कामांना आता वेग आला आहे. पावसामुळे रखडलेली हळदीची लावणी गतीने सुरू आहे. तालुक्यात जवळपास पाचशे एकरवर हळदीची लागवड झाली आहे

हळदीला सलग दोन वर्षे मिळालेला सरासरी १४ ते १५ हजार रुपये दर टिकून राहिल्याने पारंपरिक हळद उत्पादक शेतकऱ्यांबरोबर नवीन शेतकऱ्यांनीही हळद लागवडीला प्राधान्य दिले आहे. साधारणपणे मेच्या मध्यावर नवीन हळद लागवडी होतात. त्यासाठी शेतकरी जमिनीची उभी-आडवी नांगरट करून शेणखत विस्कटून सऱ्या सोडून ठेवतात.

अक्षय तृतीयेनंतर हळद लागवडीला गती येते, परंतु १८ मे पासून मॉन्सूनपूर्व पावसाने संपूर्ण सांगली जिल्ह्याला झोडपले. त्यामुळे शेतकऱ्यांनी नियोजित केलेल्या हळद लागवडी रखडल्या. गेले चार-पाच दिवस झाले पावसाने उसंत दिल्याने हळूहळू वाफसा येऊ लागला आहे. त्यामुळे या रखडलेल्या हळद लावणीने आता गती घेतली आहे.

अनेकांनी ठिबकवर या हळदीची लागवड केली आहे. त्यासाठी सेलम जातीच्या वाणाची निवड केली आहे. बीज प्रक्रिया करून हळद कंद लावले जातात. जमिनीत आता चांगला वाफसा येऊ लागल्याने हाताने माती बाजूला करून कंद मातीआड केले जात आहेत. त्यानंतर ड्रीप अंथरून ‘ठिबक’द्वारे पाणी देण्याची सोय केली जात आहे.

एक एकर लावण्यासाठी साधारणपणे दहा क्विंटल बियाण्यांची गरज असते. प्रतिक्विंटल सहा हजार ते साडेसात हजार इतका दर बियाण्यांसाठी शेतकऱ्यांना मोजावा लागत आहे. पारंपरिक हळद लागवड करणाऱ्या शेतकऱ्यांना स्वतःचे बियाणे उपलब्ध असतात.

परंतु नवीन लागवड करणाऱ्या शेतकऱ्याला मात्र बियाण्यांसाठी सुरुवातीला मोठा खर्च करावा लागतो. हळदीला चांगला दर मिळत असल्याने अनेकांनी इतर पिकाऐवजी हळद लागवडीला प्राधान्य दिले आहे.

शेतकऱ्यांनी आडसाली उसात हळदीला प्राधान्य दिले आहे. आष्टा (ता. वाळवा) येथील योगेश चौगुले मागील पंधरा वर्षांहून अधिक काळ हळदीचे पीक घेतात. मेमध्ये हागण तर फेब्रुवारीच्या सुरुवातीला त्याची काढणी केली जाते. हळद काढल्यानंतर लगेच नवीन वाणाच्या ऊस बियाण्यांची लागण केली जाते. १२ ते १३ महिन्यांत तो ऊस गळितास जाईल, असे नियोजन असते.