Solapur News : ः परिवहन मंत्री व एसटी महामंडळाचे अध्यक्ष प्रताप सरनाईक यांनी पंढरपूर दौऱ्यावर असताना पुणे-सोलापूर महामार्गावरील एसटीच्या अधिकृत हॉटेल थांब्यांना अचानक भेट दिली. तेथील प्रवासी व एसटी कर्मचाऱ्यांशी संवाद साधला. त्यांना मिळणारे अन्नपदार्थ ताजे आहेत का, अन्नपदार्थ वाजवी दरात मिळतात का, तसेच महामंडळाची नाश्ता योजना चालू आहे का, याची चौकशी केली.

या पाहणी दौऱ्यात त्यांनी तेथील प्रसाधनगृहांचीदेखील आवर्जून पाहणी केली. या वेळी महिला प्रवाशांनी प्रसाधनगृहाच्या अस्वच्छतेबाबत तक्रार नोंदवली. त्याची तातडीने दखल घेत मंत्री सरनाईक यांनी सदर प्रसाधनगृहे तातडीने दुरुस्त करण्याचे निर्देश संबंधित हॉटेल मालकाला दिले. तसेच आढळलेल्या इतर त्रुटींबाबत संबंधित मालकाला विहित वेळेत त्या दूर करण्याचे निर्देश दिले.

अन्यथा, सदर हॉटेल थांबा नाईलाजाने रद्द करण्याचे निर्देश देऊ, असे सांगितले. दरम्यान, हे हॉटेल थांबे ज्या पुणे विभागात येतात त्या विभाग नियंत्रकांशी संपर्क साधून या हॉटेल थांब्यांच्या त्रुटींची पूर्तता पुढील एक महिन्यात करण्याचे निर्देश दिले.

...तर चालक-वाहकांवर कारवाई

भिगवणजवळील एका अनधिकृत हॉटेल थांब्यावर एसटीच्या अनेक बसेस थांबलेल्या परिवहनमंत्री सरनाईक यांच्या निदर्शनास आले. त्यांनी तेथे भेट देऊन पाहणी केले असता, अत्यंत अस्वच्छ वातावरणात प्रवाशांना जेवण वाढले जात असल्याचे त्यांना दिसून आले. याबाबत त्यांनी तीव्र नाराजी व्यक्त करून संबंधित वाहन, चालकांवर कडक कारवाई करावी, असे एसटीच्या अधिकाऱ्यांना निर्देश दिले.