Ahilyanagar News: दोन वर्षांपासून रखडलेल्या नायब तहसीलदारांच्या सोमवारी (ता.२) बदल्या करण्यात आल्या. नाशिक विभागात ४४, तर जिल्ह्यात १० नायब तहसीलदारांच्या बदल्या झाल्या. एका नायब तहसीलदारास मुदतवाढ देण्यात आली आहे.जिल्हा निवडणूक शाखेतील नायब तहसीलदार प्रशांत गोसावी यांची नेवासे तहसील कार्यालयात निवडणूक शाखेत नायब तहसीलदार म्हणून बदली झाली. याच शाखेतील शंकर रोडे यांची सामान्य प्रशासन विभागात बदली झाली.

राहाता तहसील कार्यालयातील निवडणूक शाखेचे नायब तहसीलदार एस. डी. ओहोळ यांना सेवानिवृत्तीपर्यंत याच पदावर मुदतवाढ देण्यात आली. श्रीगोंदे येथील निवडणूक नायब तहसीलदार पी. के. नेवसे यांची येवला येथे निवासी नायब तहसीलदार या पदावर बदली झाली. नेवासे येथील निवडणूक नायब तहसीलदार किशोर सानप यांची पाथर्डी येथे नायब तहसीलदार या पदावर बदली.

संगमनेर उपविभागीय कार्यालयातील नायब तहसीलदार एस. बी. लोमटे यांची शेवगाव येथे महसूल नायब तहसीलदार म्हणून शेवगाव येथे बदली झाली. संगमनेर येथील संजय गांधी योजनेचे नायब तहसीलदार आर. एम. राऊळ यांची श्रीरामपूरला निवासी नायब तहसीलदारपदी बदली झाली. अकोले येथील संजय गांधी योजनेचे नायब तहसीलदार एम. ए. माळवे यांची संगमनेर उपविभागीय कार्यालयात बदली झाली.

श्रीरामपूरचे निवासी नायब तहसीलदार राजेंद्र वाकचौरे यांची निवडणूक शाखेत बदली झाली. पारनेरचे निवासी नायब तहसीलदार जी. आर. आढारी यांची संगमनेरला संजय गांधी योजनेत बदली झाली. चोपडा (जि.जळगाव) येथून सचिन किसन बांबडे यांची अकोले येथे संजय गांधी योजनेत नायब तहसीलदारपदी बदली झाली आहे. महसूल आणि वने विभागाचे कार्यासन अधिकारी श्रीकांत मोहिते यांनी बदलीचा आदेश काढला आहे. सर्व बदली झालेल्या नायब तहसीलदारांना बदलीच्या ठिकाणी तत्काळ हजर होण्याचे आदेशात नमूद केले आहे.