Solapur News : गेल्या पाच दिवसांपासून अभयारण्यात न दिसलेला वाघ आज (ता. २०) दुपारी एकच्या सुमारास उक्कडगाव (ता. बार्शी) शिवारात दिसल्याचा दावा शेतकरी मिठू वाघमारे यांनी केला आहे.

बऱ्याच दिवसानंतर पुन्हा उक्कडगाव शिवारात वाघाचे दर्शन झाल्याने शेतकऱ्यांमध्ये भीतीचे वातावरण निर्माण झाले आहे. याबाबत वनविभागाच्या अधिकाऱ्यांशी संपर्क केला असता, त्यांच्याशी संपर्क होऊ शकला नाही.

मिठू वाघमारे व अन्य चार महिला गव्हाची कापणी करत असताना, त्यांना अंदाजे २०० फूट अंतरावरून वाघ जात असल्याचे दिसले. वाघमारे यांनी सोबतच्या महिलांना याबाबत माहिती दिली. मात्र, तोपर्यंत वाघ नदीच्या कडेला असलेल्या दाट झाडीत गायब झाला.

वाघ येडेश्वरी मंदिराच्या दिशेने आला असून, पुढे नदीच्या कडेला जाऊन दिसेनासा झाल्याचे सांगितले.विशेष म्हणजे, काही दिवसांपूर्वीच (ता. १६) मिठू वाघमारे यांच्या गोठ्यातील वासरांवर बिबट्याने हल्ला करून त्याला ठार केले होते.

ही घटना ताजी असतानाच आज वाघाचे दर्शन झाल्याने स्थानिक शेतकरी व ग्रामस्थांमध्ये भीतीचे वातावरण आहे. यापूर्वी उक्कडगाव शिवारात वाघाने एकाच वेळी तीन जनावरांवर हल्ला करून ठार केले होते.वनविभागाने तातडीने दखल घेऊन या वाघाचा शोध घ्यावा, अशी मागणी होत आहे.