Sindhudurg News : जिल्ह्याच्या अनेक भागांत मंगळवारी (ता. २५) सायकांळी वादळीवारा आणि विजांच्या कडकडाटासह पावसाच्या जोरदार सरी कोसळल्या. दोडामार्ग तालुक्याच्या काही भागाला जोरदार पावसाने झोडपून काढले. त्यामुळे या भागातील काजू पिकांचे पुन्हा नुकसान झाले आहे. हवामान विभागाने पावसाचा अंदाज दिल्यामुळे आंबा, काजू बागायतदारांची धास्ती वाढली आहे.

जिल्ह्याच्या तापमानात गेल्या काही दिवसांपासून घट झाली होती. त्यामुळे उष्णतेच्या झळांची तीव्रता मागील काही दिवसांच्या तुलनेत कमी झाली होती. परंतु मंगळवारी दुपारी अडीच तीन वाजल्यापासून वातावरणात अचानक बदल जाणवायला सुरुवात झाली.

ढगाळ वातावरण निर्माण झाल्याने वातावरणात प्रचंड उकाडा वाढला. उन्हांच्या झळांनी अंगातून घामाच्या धारा वाहत होत्या. दरम्यान, चार वाजण्याच्या सुमारास घाटपायथ्याच्या गावांमध्ये विजांच्या गडगडाट सुरू झाला. त्यानंतर काही गावांमध्ये पावसाच्या हलक्या सरी देखील कोसळल्या.

वैभववाडी तालुक्यातील नावळे, सडुरे, कुर्ली, या गावांमध्ये पावसाच्या सरी झाल्या. त्यानतंर दोडामार्ग तालुक्यातील अनेक गावांमध्ये वादळीवारा आणि विजांच्या कडकडाटासह पावसाला सुरुवात झाली. या तालुक्यातील अनेक गावांमध्ये जोरदार पाऊस झाला. सायकांळी उशिरापर्यंत काही भागात कडकडाट आणि वादळीवारे सुरू होते.

दरम्यान, या पावसानंतर वातावरणात गारवा निर्माण झाला होता. दरम्यान, हवामान विभागाने विजांच्या कडकडाटासह काही भागांत पावसाचा अंदाज दिला आहे. या वर्षी वातावरणातील बदलाचा मोठा फटका आंबा, काजू उत्पादनावर झाला आहे. त्यातच आता पावसाचा अंदाज दिल्यामुळे आंबा, काजू बागायतदारांची चिंता वाढणार आहे.

 वाऱ्याचा वेग वाढला

जिल्ह्यात सर्वत्र मंगळवारी सायकांळी पावसाचे वातावरण निर्माण झाले. त्यानंतर अनेक भागात ताशी ३० ते ४० किमी वेगाने वारे वाहत होते. सावंतवाडी परिसरात गार वारे वाहत होते. जिल्ह्याच्या बहुतांशी भागात पावसाचे वातावरण होते.