Rajapur News : प्रतिकूल हवामान आणि अवकाळी पावसामुळे गत वर्षी नुकसान झालेल्या तालुक्यातील भू-खिणगिणी-कोतापूर-पेंडखळे परिसरातील ३०० आंबा-काजू बागायदारांना विमा परतावाच मिळालेला नाही. त्यामुळे तीव्र नाराजी व्यक्त केली जात आहे.

तालुक्यातील बागायतदारांनी दर वर्षीप्रमाणे २०२३-२०२४ या कालावधीत शासनाच्या पीकविमा योजनेत आंबा-काजू बागांचा विमा उतरवलेला होता. गेल्या वर्षी प्रतिकूल हवामान, अवकाळी पाऊस यामुळे बागायतदारांना चांगलाच फटका बसलेला आहे. गेल्या काही वर्षामध्ये अशी परिस्थिती सतत निर्माण होत आहे.

त्यामुळे बागायदारांचा खर्च आणि उत्पन्नाचा मेळ बसवलेला नाही. या परिस्थितीत शेतकऱ्यांना पीकविमा संरक्षणाच्या लाभाचा आधार असतो. यंदा तोही मिळालेला नाही. भूमंडळ पूर्वीपासून गोवळ किंवा राजापूर मंडळाशी जोडलेले होते.

भूमंडळाजवळ असलेले हवामान मापक केंद्र ओणी व गोवळ हे केंद्र सोडून कृषी विभागाने शेतकऱ्यांना विश्वासात न घेता लांजा तालुक्यातील हर्चे या हवामानमापक केंद्राला जोडलेले आहे. त्यामुळे हा गोंधळ झाला असल्याचे स्थानिक शेतकऱ्यांचे मत आहे.

शासन निकषानुसार पीक विम्याचा हप्ता भरलेला आहे. त्यामुळे महसुली निकषानुसार नुकसानभरपाई मिळावी, अशी मागणी या परिसरातील शेतकऱ्यांकडून केली जात आहे. याबाबत भू विविध सेवा सोसायटीचे चेअरमन मनोज कदम म्हणाले, ‘‘भू परिसराचे मंडल राजापूर तालुक्यात असले तरीही हा परिसर लांजा तालुक्यातील हर्चे-साटवली येथील हवामानमापक केंद्राशी जोडला गेलेला आहे.

त्यामुळे नुकसान भरपाई मिळालेली नाही. प्रशासनाच्या चुकीच्या नियोजनपद्धत आणि धोरणाचा शेतकरी, बागायतदारांना फटका बसला आहे. याबाबतची तक्रार शेतकऱ्यांनी जिल्हाधिकाऱ्यांकडे केलेली आहे.