Nagar News : दुधाला किमान ३० रुपये दर आणि पाच रुपये अनुदान देण्याचा सरकारने निर्णय घेतलेला आहे. दूध खरेदीबाबत हमीदर कायदा झाला पाहिजे हे सरकारलाही वाटते, असे दुग्धविकास मंत्री राधाकृष्ण विखे पाटील यांनी सांगितले.

गणोरे तालुका अकोले येथे शुभम आंबरे व संदीप दराडे हे दूध दराच्या मागणीसाठी गेल्या सात दिवसांपासून बेमुदत उपोषण करत होते. सात दिवसानंतरही या उपोषणाकडे दुर्लक्ष केले जात असल्याने परिसरात संताप व्यक्त झाला होता.

रविवारी (ता. ७) या उपोषणाला दुग्धविकास मंत्री राधाकृष्ण विखे पाटील यांनी भेट देऊन मागणी ऐकून घेतल्या. त्यानंतर दिलेल्या आश्वासनावर उपोषण मागे घेण्यात आले. त्यानंतर बोलताना राधाकृष्ण विखे पाटील म्हणाले, की दुधाचे मागणीपेक्षा उत्पादन अधिक आहे.

इतर राज्याच्या तुलनेत महाराष्ट्रात आता बऱ्यापैकी दर मिळत आहे. दुधाला किमान ३० रुपये प्रति लिटर दर मिळणार आहे. मात्र दुधाला हमी दर मिळावा आणि त्या संदर्भात कायदा करण्यात यावा अशी केंद्र सरकारकडे मागणी केलेली आहे.

दूध दराच्या संदर्भात सरकार सकारात्मक असून शेतकऱ्यांना वाऱ्यावर सोडणार नाही असे राधाकृष्ण विखे पाटील यांनी सांगितले. दरम्यान, पालकमंत्र्यांच्या आश्वासनानंतर उपोषणकर्त्यांनी उपोषण मागे घेतले