Beed News : महाराष्ट्र शासनाने नुकत्याच बस प्रवाशांसाठी अनेक सवलती जाहीर केल्या आहेत. मात्र दोन महामार्गावर असूनही डोंगरकिन्ही येथून सुरू असलेल्या लांब पल्ल्याच्या बस बंद झाल्याने प्रवाशांना या सवलतीचा फारसा फायदा होत नाही.

प्रशासनाने याची दखल घेत लांब पल्ल्याच्या बस सुरू कराव्यात अशी मागणी नागरिकांतून होत आहे.

डोंगरकिन्ही येथे पूर्वी रस्ते अरुंद होते व पक्केही नव्हते. त्या काळात कोपरगाव व बारामती येथून मुक्कामी बस येथे येत होत्या. मुंबईला येथून थेट बस होती.

मात्र आता डोंगरकिन्ही गाव दोन महामार्गावर आले आहे. तरीही बीड-कल्याण व पाटोदा-मुंबई या बस शिवाय येथून दुसऱ्या लांब पल्ल्याच्या बस नाहीत. त्यामुळे बारामती व कोपरगाव या मुक्कामी बस परत सुरू करण्यात याव्यात असे नागरिकांते म्हणणे आहे.

जिल्ह्याचे ठिकाण असलेल्या बीडला जाण्यासाठी सकाळी नऊ वाजेनंतर चार वाजेपर्यंत बस नाही. बीडसाठी फेरा गाडी सुरु करण्याची आवश्यकता आहे.

साखर कारखाने, औद्योगिक शहर, तीर्थक्षेत्र व दवाखाना यासाठी नेहमी प्रवासी संख्या असणाऱ्या ही बस सुरु करण्याची मागणी आहे.