Jalgaon News : ‘पंतप्रधान किसान सन्मान’ निधीसंबंधीच्या अडचणी घेऊन जाणाऱ्या शेतकऱ्यांना दुरुस्ती न करतानाच परत पाठविणे, कुठलीही बाब न एकूण घेणे असा प्रकार सुरू आहे. महसुल प्रशासन या कामाबाबत उदासीन आहे.

शेतकऱ्यांनी याबाबत अनेकदा तक्रारी केल्या. पण कुणीही ऐकूण घेत नाही. कानळदा, फुपनहरी, वडली, चिंचोली, तरसोद, सावखेडा येथील शेतकऱ्यांना तहसील कार्यालयात शेतकरी सन्मान निधीतील त्रुटी दूर करण्यासाठी अडचणी येत आहेत.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

शेतकऱ्यांनी दिलेल्या माहितीनुसार, किसान सन्मान निधी बँक खाते क्रमांकातील बदल, बँक बदलल्यास इतर कारणांमुळे मिळत नाही. बँका, तलाठी कार्यालयात चकरा मारल्या. कृषी विभागात संपर्क साधला असता तेथून तहसील कार्यालयात जा, असे सांगण्यात आले.

तहसील कार्यालयात शेतकरी सन्मान निधीचे कामकाज सांभाळणाऱ्या कर्मचाऱ्यांना अडचणी सांगितल्या. वारंवार चकरा मारूनही समस्या मार्गी लागत नसल्याने तेथे आम्ही नाराजी व्यक्त केली. महसूलने सन्मान निधीचे कामच स्वीकारलेले नाही.

महसूलचे कर्मचारी हे काम करीत नाहीत. कृषी विभागाकडे बोट दाखविले जाते. तहसीलदारांना भेटा, असे सांगितले जाते. कृषी विभाग व तहसील कार्यालयात मुजोरी वाढली आहे. शेतकऱ्यांना अपमानित केले जाते.

कर्मचारी, अधिकारी आपले अधिकार गाजवितात व कामे वेळेत करीत नाहीत. कधी नेट बंद आहे, असे सांगतात. अनेकदा दोन ते तीन तास या कार्यालयात थांबावे लागते, पण कुणी याबाबत दखल घेत नाही, अशी नाराजीदेखील या शेतकऱ्यांनी व्यक्त केली.