Solapur News : जिल्हा परिषदेचे ग्रामसेवक, आरोग्य यंत्रणेतील सर्व कर्मचारी यांचे कामकाज ऑनलाइन दिसेल, असे अॅप आम्ही तयार करत आहोत. त्याबाबत ग्रामसेवक तसेच आरोग्य कर्मचारी संघटनेशी चर्चा करून लवकरच हे ॲप विकसित करण्यात येणार आहे, अशी माहिती मुख्य कार्यकारी अधिकारी मनीषा आव्हाळे यांनी दिली.

ग्रामसेवक गावामध्ये किती वेळ राहतो? आरोग्य कर्मचारी प्राथमिक आरोग्य केंद्रात किती वेळा असतात, असे प्रश्‍न वारंवार उपस्थित होतात. त्यासाठी जिल्हा परिषदेचे हे ॲप काम करू शकेल.

या अॅपच्या माध्यमातून ठरावीक मर्यादेमध्ये जेव्हा ग्रामसेवक आणि आरोग्य कर्मचारी आल्यास त्या ॲपमध्ये त्यांच्या कामकाजाची माहिती कळेल, ते आपल्या कामकाजाची माहिती त्या ॲपमध्ये नोंद करू शकतील, असे आव्हाळे म्हणाल्या.

महामार्गात गेलेल्या जिल्हा परिषदेच्या शाळा त्याचाही प्रश्‍न बऱ्यापैकी मिटला आहे, हद्दवाढ भागातील जिल्हा परिषदेच्या शाळांचा दुरुस्तीचा प्रस्ताव पाठवला आहे, असे सांगून येणाऱ्या नवीन वर्षामध्ये ग्रामपंचायत, आरोग्य आणि शिक्षण या तीन विभागावर लक्ष केंद्रित करण्याचा संकल्प त्यांनी व्यक्त केला.

या वर्षात ‘उमेद’अभियान अंतर्गत असलेल्या बचत गटांच्या उत्पादनांना ऑनलाइन मार्केट मिळवून देण्याचा प्रयत्न आहे. त्यासाठी सोलापुरातील डॉ. आंबेडकर चौकात असलेल्या नेहरू वसतिगृहाचे दोन गाळे बचत गटाच्या वस्तू विक्रीसाठी देण्यात येणार आहेत, अशी माहितीही आव्हाळे यांनी दिली.