Nandurbar News : ग्रामीण भागामध्ये स्वच्छ भारत मिशन टप्पा- २ ची अंमलबजावणी पारदर्शक गुणवत्तापूर्वक व्हावी, जेणेकरून गाव कचरामुक्त होतील, प्लास्टिकबंदी होईल. घनकचरा, सांडपाण्याचे व्यवस्थित व्यवस्थापन होईल म्हणून आता गावावर स्वच्छ भारत मिशनचा दुसरा टप्पा यशस्वी करण्याची जबाबदारी आली आहे.

ती पंचायतराज संस्थांमधील सर्व लोकप्रतिनिधी गावपातळीवरील शासकीय कर्मचारी यांनी मिळून मिसळून यशस्वी करून दाखवावी, असे प्रतिपादन शहादा पंचायत समिती गटविकास अधिकारी राघवेंद्र घोरपडे यांनी अभियानाच्या अंतर्गत आयोजित दोन दिवसीय प्रशिक्षण कार्यक्रमाच्या समारोप प्रसंगी बोलताना केले.

पाणीपुरवठा व स्वच्छता विभाग, महाराष्ट्र शासन, राज्य पाणी व स्वच्छ्ता मिशन, जिल्हा परिषद नंदुरबार यांच्या मार्गदर्शनाखाली नवनिर्माण सर्व समाजहितार्थ संस्था नंदुरबारतर्फे घनकचरा व सांडपाणी व्यवस्थापनकरिता भागधारकांच्या दोनदिवसीय क्षमता बांधणी प्रशिक्षणाचे आयोजन येथील हॉटेल अतिथी रेसिडेन्सी येथे करण्यात आले होते.

प्रशिक्षण अंतर्गत मानवी जीवनात स्वच्छतेचे महत्त्व, स्वच्छ भारत अभियान टप्पा क्रमांक दोनचा परिचय, घन कचरा आणि सांडपाणी व्यवस्थापन, त्यासंदर्भातील विविध उपायायोजना, शासन निधीची उप्लब्धता,

ग्रामस्थांची भूमिका व जबाबदारी, याविषयी तज्ज्ञ प्रशिक्षक सुरेश महाले, प्रकाश सोनवणे, सुशील गावित, दीपक पावरा, रवी गोसावी, प्रमोद वाणी, संजय वळवी, मालिनी गावित, मनीषा पाडवी, पूजा शर्मा यांनी प्रशिक्षण दिले.