Beed News : चौसाळा कृषी मंडळात मागील पंधरा दिवसांत काही दिवस सारखेच ढगाळ वातावरण राहिल्यामुळे हरभरा पिकावर मर, बुरशीजन्य मर रोगांचा प्रादुर्भाव मोठ्या प्रमाणावर झाला आहे. त्यात हरभरा पिकावर घाटे अळीचे प्रमाण मोठ्या प्रमाणात वाढल्याने घाटे अळ्यांनी हरभरा पीक पूर्णपणे फस्त केले. त्यामुळे येथील तीन शेतकऱ्यांनी साडेचार एकरवर हरभरा पिकावर रोटर फिरवला आहे.

पिंपळगांव घाट येथील शेतकरी भरतरी आश्रुबा तेलप यांचे दीड एकर, राम भारत पुरी यांचे दोन एकर, युवराज श्रीधर तेलप यांचे एक एकर असे सर्व मिळून साडेचार एक्कर क्षेत्रावर असलेल्या हरभरा पिकावर घाटे अळी, बुरशीजन्य मर रोगाचा मोठ्या प्रमाणात प्रादुर्भाव झाल्याने त्यांनी ट्रॅक्टरने रोटर फिरवला आहे.

तसेच अवकाळी पावसाच्या आधी पेरणी झालेल्या हरभरा पिकात मोठ्या प्रमाणावर सोयाबीन उगवून आले. शेतात सोयाबीन सोबत तणाचे प्रमाण ही मोठ्या प्रमाणात उगवले आहे.

तण व्यवस्थापन तसेच कीड रोग औषध फवारणी करूनही हरभरा पीकात सुधारणा होत नसल्याने अगदी लहान लेकरांप्रमाणे संभाळलेल्या हरभरा पिकावर पिंपळगांव येथील शेतकऱ्यांनी छातीवर दगड ठेवून साडे चार एकर हरभरा पिकात ट्रॅक्टरच्या सहाय्याने रोटर घालून पिक मोडून टाकले आहे. परिणामी शेतकऱ्यांवर दुबार पेरणीचे संकट ओढावले शेतकरी चिंताग्रस्त झाले आहेत.