Parbhani News : कृषी विद्यापीठांच्या सोयाबीनच्या वाणांचे दर्जेदार बियाणे शेतकऱ्यांपर्यंत वेळेवर पोहोचावे लागेल. बीजोत्पादन कार्यक्रमात शेतकरी उत्पादक कंपन्यांची भूमिका आणि योगदान महत्त्वपूर्ण राहील.

केवळ बीजोत्पादन नव्हे तर विक्रीची व्यवस्था उभारावी लागेल. बियाणे निर्यातीतून शेतकऱ्यांचे उत्पन्न वाढू शकेल, असे मत मान्यवर शास्त्रज्ञ, शेतकऱ्यांनी मांडले.

वसंतराव नाईक मराठवाडा कृषी विद्यापीठातील अखिल भारतीय समन्वित सोयाबीन संशोधन केंद्रातर्फे रविवारी (ता. २९) शेतकरी उत्पादक कंपनी कार्यशाळा आणि सोयाबीन प्रक्षेत्र भेट दिन कार्यक्रम घेण्यात आला.

अध्यक्षस्थानी कुलगुरू डॉ. इंद्र मणी मिश्रा होते. भारतीय कृषी संशोधन परिषदेचे सहायक महासंचालक (बियाणे) डॉ. डी. के. यादव, मउ (उत्तर प्रदेश) येथील भारतीय बियाणे विज्ञान संस्थेचे संचालक डॉ. संजय कुमार, केंद्रीय कृषी आणि शेतकरी कल्याण विभागाचे उपायुक्त डॉ. दिलीपकुमार श्रीवास्तव, सत्येंद्र द्विवेदी, संशोधन संचालक डॉ. खिजर बेग, बियाणे उत्पादक संघाचे अध्यक्ष ॲड. अमोल रणदिवे, सोयाबीन पैदासकार डॉ. सुनील उमाटे,

सहयोगी संचालक (बियाणे) डॉ. एच. व्ही. काळपांडे, मध्यवर्ती प्रक्षेत्राचे प्रभारी अधिकारी डॉ. विलास खर्गखराटे आदींची उपस्थिती होती. डॉ. इंद्र मणी, डॉ. संजय कुमार, डॉ. श्रीवास्तव, रणदिवे, द्विवेदी यांनी मार्गदर्शन केले. या वेळी विद्यापीठाच्या मध्यवर्ती प्रक्षेत्रावरील सोयाबीन बीजोत्पादन पाहणीसाठी शिवार फेरी काढण्यात आली.