Chhatrapati Sambhajinagar : जायकवाडी प्रकल्पात गोदावरी पात्रातून येणारी आवक लक्षात घेता सुरक्षेच्या कारणास्तव प्रशासनाच्या वतीने गुरुवारी सकाळी ६.३० ते दुपारी २ पर्यंत पाच वेळा गोदावरीच्या नदीपात्रात टप्प्याटप्प्याने विसर्ग वाढविण्यात आला. दुपारी २ वाजताच्या सुमारास प्रकल्पाचे एकूण २७ पैकी १८ दरवाजे तीन फूट उघडून पाण्याचा विसर्ग केला जात होता.

जायकवाडी प्रकल्पातील पाणीसाठा ९९.७८ टक्क्यांपर्यंत पोहोचला होता. त्यातच परतीच्या पावसाचा जोर वाढल्याने प्रकल्पात नाशिक, नगर भागांतून गोदावरी नदीपात्राद्वारे पाण्याची आवकही वाढली आहे. असे असले तरी परतीच्या पावसाची निश्‍चिती नसल्याने एकीकडे प्रकल्प तुडुंब ठेवणे व दुसरीकडे आवक वाढत राहिल्यास खबरदारी घेण्यासाठीची दक्षता प्रशासनाला करावी लागते आहे.

गुरुवारी सकाळी ६.३० ते ७ वाजेदरम्यान २८ हजार २९६ क्युसेकने सुरू असलेला विसर्ग सकाळी ८ वाजता ३७ हजार ७२८ क्युसेकवर, सकाळी १० वाजता ४७ हजार १६० क्युसेकवर, दुपारी १२ वाजता ५६ हजार ५९२ क्युसेकवर नेण्यात आला होता. त्यात पुन्हा दुपारी २ वाजता विसर्गात वाढ करत जायकवाडीचे १८ दरवाजे ३ फूट उघडून त्याद्वारे सांडव्यामधून गोदावरीच्या पात्रात ५६,५९२ क्युसेकने पाण्याचा विसर्ग सुरू होता.

त्याचवेळी उजव्या कालव्यातून माजलगाव प्रकल्पाकरिता ५०० क्युसेकने पाणी सोडले जात होते. गुरुवारी दुपारी दोनपर्यंत प्रकल्पात ४४ हजार ७५२ क्युसेकने पाण्याची आवक सुरू होती. प्रकल्पात जिवंत पाणीसाठा ७६.१९ टीएमसी, तर एकूण साठा १०२.२६ टीएमसी झाला होता. १०२.७३ टीएमसी साठा क्षमता असलेला जायकवाडी प्रकल्प गुरुवारी दुपारी २ वाजता ९९.३९ टक्के भरलेला होता. गोदावरीच्या नदीपात्रात वाढविलेला विसर्ग लक्षात घेता प्रशासनाच्या वतीने नदीकाठच्या गावांना सतर्कतेचा इशारा देण्यात आला आहे.