Satara News : आले बियाणे काढणीच्या कामांना वेग आला असून एप्रिलअखेर बियाणे खरेदी सुरू राहणार आहे. बियाण्याच्या प्रतिगाडीस विक्रमी म्हणजेच ५० ते ५५ हजार रुपये दर सुरू आहे. तर आले (धुणीच्या) पिकांस प्रतिगाडी (५०० किलो) ४० ते ४२ हजार रुपये दर मिळत आहे. बियाण्याच्या दरात विक्रमी वाढ झाली असली तरी सरासरी इतक्या क्षेत्रात लागवड होण्याचा अंदाज तज्ज्ञांकडून व्यक्त केला जात आहे.

आले पिकांस गतवर्षीपासून चांगले दिवस आले आहेत. गतवर्षी प्रतिगाडीस विक्रमी ७० ते ७५ हजार रुपये दर मिळाला होता. त्यानंतर दरात घसरण होऊन ३० ते ३५ हजारांपर्यंत दर गेले होते. डिसेंबरपासून दरात पुन्हा सुधारणा होत गेली. फेब्रुवारीमध्ये आले पिकांचे (धुणीच्या) आल्यास ३५ हजार रुपयांपर्यंत दर होते.

मार्चमध्ये दरात सुधारणा होत जाऊन सध्या प्रतिगाडीस ४५ ते ४७ हजार रुपयांपर्यंत दर मिळाले होते. एप्रिलच्या सुरुवातीस अल्प प्रमाणात दर कमी होऊन गाडीस ४० ते ४२ हजार रुपयांपर्यंत दर मिळत आहेत. मात्र ही घट अल्प काळासाठी असून पुढील काळात दरात सुधारणा होण्याचा अंदाज आहे.

बियाणे खरेदी एप्रिलअखेरपर्यंत सुरू रहाण्याचा अंदाज आहे. अनेक शेतकऱ्यांचे आले पीक उशिरा सुप्तावस्थेत गेल्याने बियाणे काढणीही उशिरा केली जात आहे. अपुऱ्या पावसाचा परिणाम आले पिकावर दिसून येत आहे. मेमध्ये उन्हाची तीव्रता वाढत असल्याने अक्षय तृतीयेच्या मुहूर्तावर आले पिकाची लागवड होत नाही. पाणी टंचाई, उन्हाची तीव्रता यामुळे जून अखेरपर्यंत लागवड सुरू राहणार आहे. खेरदी केलेले बियाणे किमान दोन महिने ठेवावे लागत असल्याने बियाणे खरेदीही उशिरा केली जात आहे.

आले ठेवण्यावर भर

सध्या आले पिकाचे दर समाधानकारक आहेत. यामुळे पुढील काळात दरात वाढ होईल किंवा दर टिकून राहतील, असा व्यापाऱ्यांचा अंदाज आहे. त्यामुळे आल्याची विक्री न करण्याकडे शेतकऱ्यांचा कल आहे. आले जमिनीत ठेवल्यावर त्यांची वाढ सुरू होते. त्यामुळे उत्पादनात वाढ होते. यामुळे शेतकरी आले ठेवत आहेत. यामुळे कधी नव्हे ते व्यापारी आल्यासाठी शेतकऱ्यांकडे मागणी करित असल्याचे चित्र आहे.