अॅग्रोवन वृत्तसेवा
Jalgaon News : जळगाव ः खानदेशात दादर ज्वारीचा कडबा उपलब्ध होण्यास सुरुवात झाली आहे. त्याचे दर ५००० ते ५५०० रुपये प्रतिशेकडा असे आहेत. ज्वारीची मळणी, काढणी सुरू झाल्याने काही भागात कडबा उपलब्ध होण्यास सुरुवात झाली आहे.

यंदा खरिपात कमी चारा दुष्काळी स्थितीमुळे उपलब्ध झाला. यामुळे चाराटंचाई आतापर्यंत आहे. दुधाळ पशुधनाला कोरडा चारा दुरापास्त झाला आहे. माळरानात चारा नाही. तूर, सोयाबीनचा भुसाही संपत आला आहे. अशा स्थितीत पशुधनाला पुरेसा चारा खाऊ घालणे कठीण बनले होते. यात आगाप पेरणीच्या दादर ज्वारीचा कडबा उपलब्ध होण्यास सुरुवात झाली आहे. पुढे अधिकचा चारा उपलब्ध होईल.

खानदेशात बाजार समित्या किंवा अन्य भागांत दादर ज्वारीच्या कडब्याची आवक होत नाही. खरेदीदार थेट शिवार किंवा गावातून कडब्याची खरेदी करतात. कडबा खरेदी करून त्याची कुट्टी केली जाते. लागलीच ही कुट्टी वाहतूक करून तिचा साठा केला जातो. खानदेशात धुळ्यातील दुधाळ पशुपालक जळगाव, चोपडा व अन्य भागातून चाऱ्याची खरेदी करीत आहेत. काही खरेदीदार बुलडाणा भागातही चाऱ्यासाठी जात आहेत. रावेर, मध्य प्रदेशातील बऱ्हाणपूर भागातील दुधाळ पशुपालक व अन्य शेतकरी जळगाव, चोपडा, शिरपूर भागातून दादरच्या कडब्याची खरेदी करीत असल्याची स्थिती आहे.

यंदा दर काहीशी वाढ
कोरडवाहू दादर ज्वारीच्या कडब्याचे दर अधिकचे आहेत. हा कडबा यंदा दुरापास्त आहे. तो फक्त तापी, अनेर नदीच्या क्षेत्रात उपलब्ध आहे. कोरडवाहू दादर ज्वारीची पेरणी दिवाळीच्या काळात काळ्या कसदार जमिनीत जळगाव, चोपडा, अमळनेर, धुळ्यातील शिरपूर आदी भागांत झाली होती. या क्षेत्रात पीक मळणी सुरू आहे. काही भागात पीक मळणीवर आले आहे. मागील वर्षी दादर ज्वारीच्या कडब्याचे दर प्रतिशेकडा ५००० रुपयांपर्यंत होते. यंदा दर काहीसे अधिक आहेत.