Mumbai News : राज्यातील दूध संस्थांमध्ये खरेदी-विक्रीसाठी वापरण्यात येणारे वजन काटे अचूक असावेत. या काट्यांवर १०० मिलिपेक्षा कमी दुधाचे मोजमाप होत नाही. त्यामुळे दूध उत्पादकांचे मोठे नुकसान होत आहे.

यामुळे हे काटे अचूक करावेत, अशी मागणी करण्यात आली. मात्र अन्न व नागरी पुरवठा विभाग हे काटेच रद्द करण्याची शक्यता असून त्यासबंधी चर्चा करण्यासाठी बुधवारी (ता. १८) बैठक बोलविण्यात आली आहे.

दरम्यान, या बैठकीला वैद्यकीय शिक्षणमंत्री हसन मुश्रीफ यांना बोलविण्याचे आदेशही देण्यात आले आहेत. मुश्रीफ यांची कोल्हापुरातील गोकुळ या संस्थेवर सत्ता असल्याने त्यांना बोलविण्यात आल्याचा आरोप तक्रारकर्ते रूपेश पाटील यांनी केला आहे.

राज्यातील दूध संस्थांमध्ये सध्या मापाऐवजी वजन काट्यावर दूध संकलन केले जाते. या इलेक्ट्रॉनिक वजन काट्यांवर १०० मिलिपेक्षा कमी दुधाचे मोजमाप होत नाही. १०० ग्रॅमची सूट ही एका दिवशी १ हजार किलो वजनाच्या वजन काट्यासाठी वापरली जाते. पण दूध संस्थांमध्ये शंभर ते दीडशे किलो वजनाच्या काट्यांसाठी मात्र १०० ग्रॅमचे मोजमाप केले जात नाही.

याचे कारण दूध उत्पादकांचे दैनंदिन हजारो मिली अतिरिक्त दूध संस्थेला मिळत असते. वास्तविक दूध उत्पादकांना ते मिळणे गरजेचे आहे. ‘‘दुधाचे मोजमाप अचूक व्हावे, यासाठी वैधमापनशास्त्र विभागाने १२ ऑक्टोबर रोजी आदेश दिले आहेत. त्यात दूध मोजमाप करणाऱ्या इलेक्ट्रॉनिक वजन काट्यांमध्ये १० मिलि कमी मोजमाप होऊ नये, असे आदेश दिल्याने त्याचे शेतकऱ्यांनी स्वागत केले.

बहुतांश दूध संस्थांनी त्याचे पालन करण्याचे मान्य केले. मात्र ‘गोकुळ’ने हे आदेश धाब्यावर बसविले आहेत. या संघाचे चेअरमन अरुण डोंगळे यांनी वजन काट्यांबाबत देण्यात आलेले आदेश पाळण्यास नकार दिला आहे,’’ असे पाटील यांनी सांगितले.