Nagpur News : नागपूर जिल्हा मध्यवर्ती सहकारी बँक घोटाळा प्रकरणी काँग्रेस नेते व माजी मंत्री सुनील केदार यांना धक्यावर धक्के बसत आहेत. मागिल आठवड्यात केदार यांना ट्रायल कोर्टाने केदार यांना झटका देताना बँक घोटाळा प्रकरणी पाच वर्षांची शिक्षा ठोठावली होती. त्यापाठोपाठ शनिवार (३० रोजी) नागपूर सत्र न्यायालयाने केदार यांना मोठा धक्का दिला आहे. न्यायालयाने त्यांचा जामीन फेटाळला आहे. त्यामुळे केदार यांच्या अडचणीत वाढ झाली असून त्यांना आता आणखीन काही दिवस कारागृहातच राहवं लागणार आहे.

गेल्या आठवड्यात ट्रायल कोर्टाने केदार यांच्यासह सहा आरोपींना दोषी ठरवत शिक्षा ठोठावली होती. तर केदार यांना बँक घोटाळा प्रकरणी पाच वर्षांची सुनावली होती. त्यानंतर सत्र न्यायालयात त्यांच्या जामिनावर सुनावणी सुरू होती.

शनिवारी झालेल्या सुनावणीत नागपूर सत्र न्यायालयाने केदार यांचा जामीन फेटाळला. तसेच केदार यांना सुनावलेली शिक्षा चुकीची असल्याचे कुठलेही पुरावे सादर करण्यात आलेले नाहीत. त्यामुळे त्यांना जामीन देता येणार नाही. तर त्यांना जामीन दिल्याने समाजात चुकीचा संदेश जाईल असे मत न्यायालयाने नोंदवले आहे. केदार यांचा जामीन फेटाळण्याबरोबरच दोषसिद्धीला स्थगितिची मागणी देखील न्यायालयाने फेटाळून लावली.

केदार यांच्या जामीन आणि दोषसिद्धीला स्थगितिची सुनावणी अतिरिक्त सत्र न्यायाधीश आर. एस. पाटील (भोसले) यांच्या न्यायालयापुढे झाली. यावेळी अतिरिक्त सत्र न्यायाधीश यांनी हा आदेश दिला. तसेच केदार यांच्यासह एक अन्य आरोपी अशोक चौधरींचाही जामीन न्यायालयाने फेटाळला. तर इतर आरोपींच्या जामिनावर २ जानेवारीला सुनावणी होणार आहे.

काय आहे बँक घोटाळा प्रकरण?

नागपूर जिल्हा मध्यवर्ती सहकारी बँकेत २००२ मध्ये १५० कोटींचा घोटाळा झाला होता. घोटाळा झाला तेंव्हा बँकेचे अध्यक्ष सुनील केदार होते. तर बँकेने २००२ मध्ये १५२ कोटी रुपयांपेक्षा अधिक रकमेच्या सरकारी रोखी खरेदी केल्या होत्या. त्यावरून केदार यांच्यासह सहा जणांवर आरोपपत्र दाखल करण्यात आले होते.