Kolhapur News : प्रचंड घोषणाबाजी आणि हुर्रेबाजीमध्ये गोकुळची आज (30ऑगस्ट) वार्षिक सर्वसाधारण सभा अवघ्या एका तासामध्ये संपन्न झाली. सत्ताधारी गटाकडून सभासदांकडून उपस्थित करण्यात आलेल्या सर्व प्रश्नांची उत्तरे देण्यात आल्याचा दावा करण्यात आला, तर विरोधकांकडून ठरावधारकांना मत मांडू दिले गेले नाही, असा आरोप गोकुळ संचालिका शैमिका महाडिक यांनी केला.

संघाच्या पशू वैद्यकीय सेवेचा बोजवारा उडालेला असताना पशू वैद्यकीय महाविद्यायाचा घाट कशासाठी असा सवाल उपस्थित करण्यात आला. तसेच मागील 4 वर्षात गोकुळच्या ठेवीत घट कशी झाली असा सवाल महाडिक यांनी उपस्थित केला.

यावर गोकुळ अध्यक्ष अरुण डोंगळे म्हणाले की, सभासदांनी बोलायचं असताना आवाज दाबण्याचा प्रश्नच येत नाही.  बोर्ड मिटींगला सातत्याने त्या गैरहजर असतात, आमच्याकडे नोंद असल्याचे अरुण डोंगळे म्हणाले. 

शौमिका महाडिक सभास्थळी जात असताना कार्यकर्त्यांनी मोठ्या प्रमाणात गर्दी केली होती यावेळी कार्यकर्त्यांनी झेंडे हातात जोरदार घोषणाबाजी केली यादरम्यान पोलिसांनी त्यांना रोखण्याचा प्रयत्न केला यामध्ये पोलीस आणि कार्यकर्ते यांच्यात जोरदार झटापट झाली तर काही कार्यकर्त्यांनी महिला पोलिसांना धक्काबुक्की केल्याची घटना घडली.

सभेचे कामकाज बरोबर एक वाजता सुरू झाले यावेळी विरोधकांनी आमचा आवाज दाबण्याचा प्रयत्न करत असल्याची जोरदार घोषणा केली.