Solapur News : या वर्षीचा पावसाळा आता अंतिम टप्प्याकडे येऊ लागला आहे. या वर्षी पावसाने जिल्ह्यात समाधानकारक हजेरी लावल्याने आगामी वर्ष शेती व पिण्याच्या पाण्यासाठी चांगले जाणार असल्याचे वातावरण निर्माण झाले आहे. शुक्रवारपासून (ता. १३) सूर्याचा उत्तरा नक्षत्रात प्रवेश झाला आहे. नक्षत्र बदलले तरीही सोलापूरच्या वातावरणात फारसा काही परिणाम झाला असल्याचे दिसत नाही.

सोलापूर शहर व परिसरात आता उन्हाचा चटका हळूहळू वाढू लागला आहे. आज सोलापूर शहर व परिसरात ३१.४ अंश सेल्सिअस कमाल तापमानाची नोंद झाली. सोलापूर जिल्ह्यात पावसाळ्याला बैल पोळ्यानंतर खऱ्या अर्थाने सुरवात होत असल्याचा आजपर्यंत अनुभव आहे.

यावर्षी मात्र पावसाने जूनच्या सुरवातीपासूनच दमदार हजेरी लावल्याने जिल्ह्यातील नदी, नाल्यांना सध्या पाणी आहे. सोलापूर जिल्ह्याच्या पिण्याचा पाण्याचा प्रश्‍न व सिंचनाचा प्रश्‍न उजनी धरण भरल्याने सुटतो. त्यामुळे जिल्ह्याचे लक्ष कायम उजनीवर असते.

यावर्षी ऑगस्टच्या पहिल्याच आठवड्यात उजनी धरण १०० टक्के भरल्याने जिल्ह्यातील व्यापारी व शेतकरी यांच्यामधून समाधान व्यक्त होत आहे. सोलापूर हा रब्बीचा जिल्हा म्हणून ओळखला जातो. रब्बीच्या पेरण्यासाठी आता शेतकरी मशागत करू लागला आहे. लवकरच रब्बीच्या पेरण्यांना अधिक वेग येण्याची शक्यता आहे.