Nashik News : गेल्या पाच वर्षांत कसमादे भागात आगाप द्राक्ष उत्पादन घेणाऱ्या शेतकऱ्यांनी अनेक चढ-उतार पाहिले. अत्यंत प्रतिकूल परिस्थितीत शेतकऱ्यांनी बागा टिकवल्या आहेत. चालू हंगामातील पहिल्या द्राक्ष खुड्याचा मान बिजोटे (ता. सटाणा) येथील शेतकरी जयवंत जाधव यांना मिळाला आहे. निर्यातदरांकडून शिवारखरेदी सुरू झाली असून, मुहूर्ताला प्रतिकिलो १२५ रुपयांचा दर मिळाला आहे.

गेल्या पाच वर्षांत कधी नैसर्गिक आपत्ती तर कोरोना काळात अस्थिर बाजारपेठेचा मोठा फटका शेतकऱ्यांना बसला. यंदाचे हंगाम सुरळीत जाईल असे चित्र असतानाच झालेल्या जोरदार पावसामुळे बागांचे अनेक ठिकाणी नुकसान आहे. मात्र ज्या शेतकऱ्यांनी संरक्षित शेतीचा अवलंब करत क्रॉप कव्हर बसवले अशा क्षेत्रांमध्ये तुलनेत नुकसान कमी दिसून येत आहे. यंदाही प्रयोगशीलता आणि धाडसी वृत्तीने पूर्वहंगामी उत्पादन घेत द्राक्षांचे खुडे सुरू झाले आहेत.

‘अधिक जोखीम अधिक दर’ असे द्राक्ष उत्पन्नाच्या परताव्याचे सूत्र असणाऱ्या या द्राक्ष काढणीची लगबग सुरू झाली आहे. मात्र आगाप द्राक्ष काढणीला असताना पावसाने काही ठिकाणी घात केला. मात्र बाजारात सध्या मागणी चांगली असल्याने मुहूर्ताला चांगले दर मिळाले आहेत. तर पुढेही द्राक्ष टप्प्याटप्प्याने बाजारात येणार असून दर टिकून राहतील, अशी अपेक्षा शेतकऱ्यांना आहे.

सरासरी ११० रुपयांचा दर

आगाप द्राक्ष हंगामाची काढणी सुरू झाली असून सध्या कसमादे भागात उच्चांकी १२५ रुपयांनी सफेद द्राक्ष मालाचे व्यवहार झाले आहेत. त्यामध्ये किमान ९० रुपयांपासून कमाल १२५ रुपये दर आहेत. तर सरासरी ११० ते ११५ रुपयांनी मालाच्या प्रतवारीनुसार व्यवहार होत आहेत. रंगीत द्राक्षांची काढणी पुढील सप्ताहात सुरू होण्याची शक्यता आहे. त्यास या दरापेक्षा अधिक दर मिळतील, असे शेतकऱ्यांनी सांगितले.