Kolhapur News : शेतकरी संघाला ऊर्जितावस्था देणार म्हणून सर्वपक्षीय नेते एकत्र आले. संघात एकतर्फी आणि बहुमताने सत्ताही काबीज केली. मात्र, काही संचालक बाहेरगावी गेले आहत, कोणी आजारी आहेत, तर कोणाला वेळ मिळत नसल्याचे कारण सांगून शनिवारी (ता. १७) होणारी संचालक मंडळाची पहिलीच बैठक शुक्रवारी (ता.२३) घ्यावी लागणार आहे.

शेतकरी सहकारी संघाचा तोटा भरून काढून संघाला ऊर्जितावस्था देण्याची घोषणा करत सर्वपक्षीय नेत्यांनी संघाच्या निवडणुकीत मोट बांधली. पालकमंत्री हसन मुश्रीफ, आमदार सतेज पाटील, आमदार विनय कोरे, आमदार पी. एन. पाटील, खासदार धनंजय महाडीक, आमदार अमल महाडीक, माजी आमदार चंद्रदीप नरके यांच्यासह इतर पक्षांच्या नेत्यांनी संघाच्या पॅनेलमध्ये आपापले प्रतिनिधी दिले.

संघासाठी भरगच्च पॅनेल बांधणी केली. या पॅनेलपुढे विरोधकांचा टिकाव लागला नाही. सर्वपक्षीय नेत्यांच्या पाठबळामुळे संघाला निश्‍चितपणे ऊर्जितावस्था येईल, या आशेने सभासदांनीही या पॅनेलला भरघोस मतांनी विजयी केले. मात्र, नूतन संचालकांच्या पहिल्या बोर्ड मिटिंगला अजूनही मुहूर्त लागलेला दिसत नाही. शनिवारी (ता. १७) होणारी पहिली बैठक विविध कारणांमुळे पुढे ढकलण्याची वेळ संचालकांवर आली आहे.

संचालकांना पहिल्याच बैठकीला वेळ मिळत नसेल तर पुढचा कारभार कसा असेल, असा अंदाज सभासदांकडून बांधला जात आहे. संघाच्या अध्यक्ष निवडीवेळी अनेक संचालकांनी संघाच्या हिताची भाषणे केली. अध्यक्षांनीही संघाला गतवैभव मिळवून देण्यासाठी योग्य नियोजन करणार असल्याचे सांगितले. त्यामुळे संघाचा भविष्यातला कारभार चांगला आणि संघाला ऊर्जितावस्था देण्याच्या दृष्टीने होईल, अशी अपेक्षा बाळगली होती. त्यामुळे पहिली बैठक वेळेत नसली तरी होणाऱ्या बैठकीत कोणते निर्णय घेतले जाणार, याकडे लक्ष लागले आहे.

१० लाख अद्याप जमा नाहीत

संघाच्या नूतन संचालकांनी सात टक्के व्याजदराने संघाकडे प्रत्येकी दहा लाख रुपये ठेव ठेवण्याची जबाबदारी नेत्यांनी घेतली आहे. ही रक्कम अद्याप जमा झालेली नाही. ही रक्कम जमा झाल्यास संघाच्या कारभाराला थोडा हातभार लागण्यास मदत होणार आहे.