Mumbai News : वाडा तालुक्यातील बहुतांशी शेतकऱ्यांनी झोडणी आटोपून शेतात पेंढा (तण) रचून ठेवला आहे. जेणेकरून पेंढ्याला पुढील दिवसात चांगला भाव मिळेल. परंतु पावसाने भिजल्यानंतर व्यापाऱ्यांनी पेंढा खरेदीकडे पाठ फिरवली आहे.

त्यामुळे शेतकऱ्यांनी साठवून ठेवलेला पेंढा विक्रीविना शेतातच पडून आहे. तर काही ठिकाणी पेंढ्याला प्रतिकिलो केवळ दोन रुपयांचा भाव मिळत असल्याने शेतकरी हवालदिल झाला आहे.

तालुक्यातील पेंढा खरेदी करणारे स्थानिक छोटे-मोठे व्यापारी संगनमत करून हेतुपूर्वक काही दिवस पेंढा खरेदीकडे पाठ फिरवतात. तसेच मुंबई व वसई पट्ट्यात तबेल्यांचे व्यवसाय मोठ्या प्रमाणात आहेत.

तेथे पेंढ्याला मोठ्या प्रमाणात मागणी असून व्यापारी थेट पेंढा खरेदी करण्यासाठी येत असेल, तर हे स्थानिक व्यापारी त्यांना मज्जाव करत असतात. त्यांच्याशी हुज्जत घालून परत पाठवण्याचे प्रकार केले जातात. काही दिवसांनंतर अचानक शेतकऱ्यांच्या बांधावर जाऊन बाजारात मागणी नसल्याचे कारण ते देतात.

बाजारात मागणी कमी आहे, पावसाचा काही नेम नाही, तो कधीही पडू शकतो, अशी अनेक भीतीयुक्त कारणे पुढे करून हे स्थानिक पेंढा व्यापारी किमान पाच ते सहा किलोचा मोधळ (पेंढा) १० ते १२ रुपयाने खरेदी करतात. प्रतिोकिलो दोन रुपये भाव देऊन शेतकऱ्यांची लूट केली जाते.