Pune News: राज्यातील कृषी विभागाच्या सर्व कार्यालयांनी वार्षिक नियोजन करावे व तसेच कार्यालयीन कामे मासिक वेळापत्रकानुसार करावीत, यासाठी हालचाली सुरू झाल्या आहेत. विशेष म्हणजे कृषी आयुक्तांनी स्वतःदेखील आपल्या कामाचे वार्षिक वेळापत्रक तयार केल्याची माहिती सूत्रांनी दिली.

कृषी सहायकांपासून ते विभागीय कृषी सहसंचालकांपर्यंत विविध अधिकारी व कर्मचारी राज्याच्या क्षेत्रिय पातळीवर सध्या काम करतात. परंतु, कोणाच्याही कामाचे नियोजन ठरलेले नसते. कृषी आयुक्तालयातून सूचना आल्यानंतर सहसंचालकांची धावपळ होत असते. जिल्हाधिकाऱ्यांशी संलग्न बैठका जवळ आल्या की जिल्हा अधीक्षक कृषी अधिकारी पळापळ करतात.

जिल्हा अधीक्षकांनी काम सांगितल्यानंतरच अनेकदा तालुका कृषी अधिकारी कार्यालये हलतात. शेवटी तालुक्याच्या कार्यालयांकडून सांगितलेल्या कामानुसार क्षेत्रिय कर्मचारी जमेल तशी कामे करतात. परंतु, या साखळीत सध्या कोणाकडेही कामाचे वेळापत्रक नाही. त्यामुळे शेतकऱ्यांना जलद व पारदर्शक सेवा देण्याचे ध्येय साध्य होत नाही, असे आस्थापना विभागाच्या एका अधिकाऱ्याने सांगितले.

एका विभागीय कृषी सहसंचालकाच्या म्हणण्यानुसार, वरिष्ठांनी सांगितले तरच हालचाली करण्याची सवय कृषी खात्याच्या सर्व कार्यालयांमध्ये सध्या सुरू आहे. मात्र, स्वतःहून कोणत्याही कार्यालयाने कामाचे नियोजन केलेले नाही. त्यामुळेच कृषी आयुक्तांनी महिनानिहाय कामकाज वेळापत्रक तयार करण्याचा आग्रह धरला आहे.

कृषी आयुक्त सूरज मांढरे पूर्वी शिक्षण आयुक्त होते. शिक्षण आयुक्तालयाने स्वतःची दिशादर्शिका तयार केली आहे. त्याच धर्तीवर कृषी आयुक्तालयाने वेळापत्रक तयार करण्यासाठी प्रयत्न केले जात आहेत. ही जबाबदारी कशी पार पाडावी यासाठी अधिकाऱ्यांचा एक अभ्यास गटदेखील तयार करण्यात आला होता. या संदर्भात काही प्रशासकीय नियमावली लवकरच लागू होण्याची शक्यता आहे.”