Satara News : परिसरातील अनेक गावांची तहान भागविणाऱ्या तळहिरा पाझर तलावातील पाणी उपशामुळे सध्या हा तलाव अखेरची घटका मोजत आहे. त्यामुळे या भागातील अनेक गावांसाठी दुष्काळाचे संकट अधिक गडद होत चालले आहे.

२०२२-२३ मध्ये या परिसरात १६०० मिलिमीटर अतिवृष्टी झाली होती. त्यावेळी हा तलाव पूर्ण क्षमतेने भरला होता. चालू वर्षी २०२३ -२४ मध्ये केवळ ५०० मिलिमीटर पाऊस पडल्याने परिसरात दुष्काळी परिस्थिती झाल्याने तलावात पाण्याची आवक झाली नाही.

शिल्लक पाणीसाठा तलाव परिसरातील अनेक शेतकऱ्यांनी शेतीसाठी पाणी उपसा करत संपवला असल्याने आता हा तलाव कोरडा ठणठणीत पडला आहे. यामुळे या तलावातील पाण्यावर अवलंबून असलेल्या परिसरातील अनेक गावांत पाणीटंचाई समस्या जाणवू लागली आहे.

देऊरसह परिसरातील शेकडो हेक्टर शेतीसाठी हा तलाव उपयुक्त आहे. तलाव भरल्यानंतर परिसरातील सुमारे तीन किलोमीटर अंतरावर असलेल्या विहिरी कूपनलिकांच्या पाणीसाठ्यात वाढ होते. मात्र, तलाव कोरडा पडल्याने परिसरातील विहिरी कूपनलिका आता कोरड्या पडू लागल्या आहेत. याचा परिणाम या परिसरातील बागायत क्षेत्र कमी होणार आहे.

प्रशासनाच्या दुर्लक्षामुळे या तलावात शिल्लक असलेला मृत पाणीसाठा ही येथील शेतकरी पाणी उपसा करण्यावर ठाम आहेत. त्यामुळे आता जनावरांनाही पाणी मिळणे मुश्कील झाले आहे.