Javhar News : आदिवासी बांधव जंगलात वास्तव्य करत ऋतूमानानुसार उपलब्ध होत असलेल्या रानमेव्यातून आपली गुजराण करतो. यातील पोषक भाग तथा औषधी, सुगंधी वनस्पतींचा समावेश आपल्या आहारात करून सुदृढ आरोग्य जीवनपद्धतीचा अवलंब करतात.

आदिवासी बांधवांची जीवनपद्धती आणि जंगलातील विविध पदार्थांपासून तयार झालेले विविध मेनू शहरातील नागरिकांच्या आहारात असावेत, याबाबत शबरी आदिवासी वित्त व विकास महामंडळाकडून उपक्रम राबवण्यात येत आहे.

पालघर तथा अन्य आदिवासी जिल्ह्यातील आदिवासींनी बनविलेली मिठाई परदेश वारीला निघाली आहे. आदिवासी संस्कृतीला जागतिक व्यासपीठावर नवी ओळख करून देण्यासाठी शबरी आदिवासी वित्त व विकास महामंडळाने पावले उचलली आहेत.

आदिवासी बांधवांनी हस्तकलेच्या माध्यमातून बनवलेल्या उत्कृष्ट उत्पादनांना जागतिक व्यासपीठ मिळाले, तर आदिवासी बांधवांचे जीवनमान उंचावतानाच त्यांना आर्थिकदृष्ट्या सक्षम करण्यासाठी ‘शबरी नॅचरल्स’च्या माध्यमातून विविध प्रयास केले जात आहेत.